انهض ياوطن
*************
لكيت الناس بيـــــك اشكال والوان
كثره بلا عدد تزهي العناوين

وتسحر ناظرك باحله الشعارات
ومكلوبه وعكس تحمل مضامين

ادور عالصدك بس الصدك مات
الجذب اصبح سمه وطبع الدواوين

بدفك كلهه دكت ياوطن ليش
اليعرس واحد وميه المجانين

ملايين التضدك واحد وياك
شيصير الواحد كبال الملايين

وشذكر ياوطن ياجرح شنو لبيك
اذا كلك جرح يابو المساكين

شفت حته اليحبك صاير عليك
وشفت حته الملك صارت شياطين

اليقدملك ورد بالك تثق بي
اشك حته الورد شايل سجاجين

اشو كل شي انكلب وصار معكوس
السناجب هم خذت طبع الثعابين

وخايف عالبلابل تصبح اصكور
وشوف الزلم تتحول نساوين

لياحد ياوطن تنزف دمه واه
ولياحد للسمه تقدم قرابين

دكلي جم حسين وكبله عباس
نزفت انهار من دم الميامين

حسبنه الظلم راح ومشه ابعيد
رجع مو قاط شو هالمره قاطين

ومن راح الصنم كيفنه بالجاي
مشه الملعون بس خلف ملاعين

وبنينه اقصور بس اقصورنه ارمال
وبنينه احلام بس طلعت كراتين

انهض ياوطن واجمع بقاياك
بفاسك كسر اضلوع الزنازين

لاترضخ بعد وترجع الفات
صير اشواك بعيون السلاطين

وخل شمعك يوج ويضوي النجوم
وخل فرحك يطش عله الصواوين
**********************************

ان شاء الله تعجبكم
الله يحفظ العراق والعراقيين من الظلمة

اختيار رائع عزيزتي ملاك
قصيدة جميلة بكلماتها واحساسها بالحزن على وطن الحضارات
وفيها شجن والم
سلمت يداك على هذا النقل المميز
وشكرا لشاعر الناصرية شاكر الشمري على هذا النظم


دمتي بخير وتحياتي لك

قصيدة رائعة عاشت الايادي للنقل الرائع

تحياتي وتقديري

مشكورة اخوتي الأعزاء لمروركم العطر تحياتي لكم