المشهد الأول:

«يجلس قرني التومرجي في عيادة الدكتور عزت»

رجل: «لقرني» هو الدكتور فين أنا قاطع مستعجل بقالي أربع ساعات.. المغص اللي كان عندي راح وضهري هو اللي تاعبني من كتر القاعدة.


قرني: الدكتور زمانه جاي.. وبعدين الناس كلها قاطعة مستعجل ولا عايزني أسفرك تتعالج بره!

امرأة: عندي صداع هيخلي دماغي تلف تلتمية وستين درجة

شاب: «لقرني» هات يا عم فلوسي أنا هنزل ألعب بلاي ستيشن

قرني: فلوسك إيه هو إنت حاططها ف البوسطة.. يا جماعة اتسلوا دا الدكتور مشترك ف النايل سات

الرجل: «ينظر إلي التلفاز فيجده جثة هامدة» ولما فيه تليفزيون ما تفتحه

قرني: وشرفك هو كده مفتوح

قطع


المشهد الثاني:

«يظهر الدكتور عزت والدكتورة كريزة في مطعم»

كريزة: خايفة تكون بتتسلق علي حبلي الشوكي عشان مصلحة .. حاسة إنك بتحبني دعامة بعدما التجاعيد اتحفرت ف وشي زي الأرض الزراعية.

عزت: طب إنشا الله تجيلي كل الأمراض وأتمسك ف عمليات إجهاض.. يارب اللقمة اللي باكلها تنزل حريق وتتحشر في المرئ لو كنت باستخدمك قسطرة وبرمي عليكي هلب

كريزة: يبقي ناخد فترة نقاهة وما تتصلش فيها خالص.. نبعت لبعض إس إم إس علي قناة المعلومات

عزت: «ينهض في غضب» كده أنا هاخد موقف كان لازم أعمله من زمان.. أنا هزود سعر الكشف عندي

قطع

المشهد الثالث:

«تتعالي الاشتباكات مع قرني في العيادة»

رجل: يا جدع كلمه ع الموبايل أمراض الدنيا عدت عليا وأنا قاعد

قرني: ما ينفعش يا بيه.. الموبايل بتاعه اتدلق عليه سافلون

قطع

المشهد الخامس:

«يتهيأ المرضي للكشف بعد دخول عزت»

شاب: «لرجل» قولتلي الدكتور دا تخصص إيه؟

الرجل: هو أساسا أنف وأذن.. بس أنا خالع عنده ضرس قبل كده

الشاب: المهم يكون كويس أنا أول مرة آجي

الرجل: أنا بتعالج عنده من زمان لما كان عندي تليف ف الكبد

الشاب: ودلوقتي؟

الرجل: بقي فيه تليف بس

قطع

المشهد السادس:

«يظهر عزت مع أحد المرضي في حجرة الكشف»

المريض: يا دكتور علاج البرد بتاعك مش عاملي حاجة. دا انت لو كاتبلي علي كيس مناديل كان زماني خفيت

عزت: يا أستاذ انت عندك دورين برد فوق بعض.. اللي زيك ما يروحش لدكتور.. إنت تروح رئاسة الحي.

قطع