السلام عليكم اليوم جايبتلكم شعر للشاعر جابر الكاظمي عن العراق


آنه الوالدة وجور الوكت ذبني


آنه الوالدة وجور الوكت ذبني وأحس الروح راحت من رحت يبني
‏*** ‏
أنصبت وسط القلب مهدك يضي العين وأضلوعي تحرسك من مرام البين
وإعلى هز المهد يبني أسهرت سنتين وأشباح السهر جانن يبارني
‏*** ‏
تكبر والأمل يبني كبر وياك لدارك من تطبها بلهفة أتلقاك ‏
تصد عيني إعلى طولك والكبد يرعاك ماأدري تروح وتنفقد مني
‏*** ‏
وين سنين عمري الجانت تباريك وين السهر يبني اللي سهرته إعليك
بسرعة تروح مني ماجنت أدريك فقدك وأنقطع منك بعد ظني‏
‏*** ‏
تنوح الوالدة الغاب الولد عنها اشلون اللي أبنها ينفقد منها
مايبطل بجاها ولايخف ونها وأنا خلافك يفت صم الصخر وني
‏*** ‏
عشت ويا النباب وبقلي ربيتك مني تنفقد وتروح مدريتك
آنه لو أدري بسواد عيوني ضميتك لامن بعدك أحمل هالغصص ذني
‏*** ‏
يامن جنت شمعة زاهية بداري وياوجه البراءة العاش بأفكاري
أحن إعليك يبني ليلي ونهاري وحتى الفاجدات أجزعن من حني
‏*** ‏
من بعدك أقضي بالحزن يومي يجيني الليل وأتوسد على همومي‏
كل لحظة أفز مرعوبة من نومي جنك مامتت آنه المتت جني
‏*** ‏
رحت وبقلبي كم لوعة حزن خليت ومثل ون الحمامة الفرقتك ونيت
جنت أتمنى تحظر دفنتي ياريت وبيدك ياشريك الروح تدفني
‏*** ‏
القصيدة للشاعر الأديب جابر الكاظمي


http://www.middle-east-online.com/pictures/big/_11758_sheikh-zayed-2-11-2004.jpg

الهم احفظ العراقين جميعهم

عاشت ايدج قصيده رائعه جدا
تقبلي تحياتي وتقديري وننتظر منك المزيد
مع تحياتي

عزيزتي بنت حديثة مرحبا بك في بيتك الثاني

والف شكر على هذا النقل الطيب

وصح لسان شاعرنه المميز جابر الكاظمي على هذه الأبيات

للعلــم -- القصيدة سبق وان نقلت على يد أحد اعضاء المنتدى

تقبلي مروري