هذه القصيدة للمرحوم رحيم المالكي
يعاتب بها نهر الفرات




شلون تجري ومايك ازرك يا فرات
وانتة ذنبك مو ذنب يفطر سما
اتسابكت بالطف على حسين السيوف
ومايك اول سهم في صدرة انرما
وطاح ابو السجاد يم جرفك شهيد
بين سيفين العدة وسيف الضما
وجان مايك احد من كل السيوف
اثر على حسين حيل والمة
السيوف اعتنت تطلب دم حسين
وهاي حاسبها الحسين بمقدمة
بس بنات المصطفى حرت جبود
وحسين حر وهاي للحر تلجمة
وعطش عبدالله التفرفح بين اديه
وكطع كماطة ولعد مايك ومه
هاي بس وحدها صارت كربلاء
على حسين وكربلا من شرذمه
انه لو منك اودي وية الطيور
ماي خاطر منسئل ليش ولمه
لكن انتة تريد تذنب يا فرات
وهاي ما تحتاج شرح وترجمة
انفرط عقد الدين وعيونك تشوف
وجان ممكن غرفة منك تلظمة
عطشيت الدين عن بكرة ابه
وكطعيت جفوف راعي الموزمة
تدري لو مايك وصل يم الخيام
جا روى العباس منهم صارمة
وجان ما ردت رؤوس على الركاب
وجان ردت روسهم تكطر دمة
شلون يمك طاح عطشان الحسين
وما ركض مايك ويم جدمة ارتمة
طاعت اسماعيل صحراء الحجاز
وانتة شح مايك لابن حامي الحمى
ما اضن اسماعيل اكرم من حسين
ولا اضن امه تتقدم فاطمة
ذاك ابن النبي الي سال الجليل
كيف تحيي الموتى وترد قائمة
وهذا ابن حيدر علي سيف الرسول
المايهاب بدينة لومة لائمة
الكال لو ينكشف عن عيني الغطاء
ما يزيد من اليقين الفاهمة
يا فرات وتجري بعدك يا فرات
المايشوف الحق عسة بعينة العمى
كلها ماتت خجل يا نهر الفرات
وانتة اخر شاهد على الملحمة
كوم طم روحك حدر كبر الحسين
واعتذر لله اطلب مرحمة
كوم اغسل مايك برمل الحسين
وخلي مايك يا نهر يتيممة
وشوف شنهو الفرق ما بين الكرام
حسين شاف الدين عطشان الدمة
ضحى باخر قطرة من دمة الشريف
وضلت اخر قطرة ثورة وقائمة
حسين صافي واصفى من ماي الجنان
وانتة مايك طين وجروفك طمة
حسين نبع الجود وانتة اسمك نهر
ويا نهر للمنبع انطة وكرمة
حسين منك لو شرب جان ارتويت
وجا تشرف مايك يلامس فمه
لاكن انتة الحض عماك وتيهيت
وسوء حضك رادلك هالخاتمة


ـــــــــــــــــــــــــــــــــــــــــــــــــ
للشاعرالشهيد المرحوم رحيم المالكي


تحياتـــــــــــــي

رائع مجنون ليلى على هذه القصيده الرائعة وننتظر منك المزيد ...........

لقد ازدادت هذه الصفحة نور من نوركم
وتم بمروركم الجميل المنى
لكم مني جزيل الشكر على المرور الطيب
مجنــــ ليليى ـــــــون
ـــ.*.ــــ.*.ــــ.*.ــــ.*.ــــ

احييك اخي العزيز واشكرك على هذا الانتقاء الرائع والذوق الرفيع
ننتظر جديدك ,,,,,,,,,,
تقبل تحياتي

قصيده رائعه جداا
تحياتي

الله يرحمة كان شاعر ممتاز.......اللهم اغفر له ذنوبه وادخله جناتك

شكرا لكل الاعضاء الكرام الذين زينو الصفحة المتواضعة بالمرور اللطيف
ولكم مني كل التحايا
مجنـــــ ليلى ــــــون
ـــ.*.ـــ.*.ـــ.*.ـــ.*.ـــ

رحمالله رحيم المالكي
واحتسبها الله له
في ميزان اعماله

قصيدة اكثر من رائعة
تحياتي