شفت بالطيف شخصك سالماني
همت ودمع عيني سالماني
علي تنشد ياغالي سالماني
عدل بس شوفتك تصعب عليه

قصر لبنيلك بعيني وقلعه
وتر كلبي لكصنه وقلعه
فدوه تروح الك شطره وقلعه
وترخصلك اهالي الناصريه

من همي الصخور اتموع وذيب
وعلي دنياي تجمع ضيم وذيب
ابن اوه انجمع والضبع وذيب
اليطلع الشاة وينه البيه حميه

حليم وعقل عندك جنت ذاراي
وكبل نسمة اعذيبي وصرت ذاراي
شجاك وسرحت بالشاة ذاراي
رايك والعقل راحن سويه

هاك اخذ الجروح وياك هارف
هادك الكلب بجفاك هـــــارف
مثل خزلت غنم وتشوف هارف
طشن مشن كل وحده بنويه

انه بدنياي صافن دوم سرحان
وهواي اهموم بالدلال سرحان
اذا شفت الغنم ماصير سرحان
لهن راعي صرت والخير اليه

مرضنه بحبك وحبك شفانه
وتسامرنه ولاواحد شفانه
تذكر يوم من طبكت شفانه
سكرنه وللارض طحنه سويه