مُرَه مُرَه
مُره مُرَه عِشرتي وياك مُرَه
ومن أريد أنساك يمنعني الكًلب
ويذبله حســـــــــره
ومن أريد أنساك , يعرضلي الدرب
ويكًلي إلك خطوات
ذكــــــــــــــرى
ومن أريد أنساك تذكرني الملامه
وشنهي ربحي وياك
واللي مادروا كًالو
تخســـــــــــــره
آنه شنهي الماخسرته وحتُى أخسره ؟
ويانهر يعتب عليٌه ... ؟؟
حتى بجناح الكًصب روجات أعبره ..
وياجبل يصعب عليك حتى أذب حبال روحي
إكًصايب أعلى جتاف صخره
وياعظم تتصوٌره إلتمْ !!
حتٌى يم بابك عشر كسرات
أكســـــــــره
مُرَه .. مُره
والمراره إتزيد لليمشي إبجزيره
ومالكًه وسادة محبه إتريح
ظهـــــــــــره
والمراره إتزيد للمايلكًه ظِلْ
وينتجي إعله الشيب عُمرَه!!
ويا جمرتي الماطفَتْ
حَسٌبت يطفيها دمعي
ثاري دمعاتي إعله خد النار شذره!!
إنته من دكًيت بابي
جبت وياك الحزن خطار ماين
والفرح طلٌعته برٌه!!
آنه من شكًيت زيجي إحتركَت إيدي
وانته من شكًيت زيجك شفنه كًمره...
كان عمري نهر صافي
ومايه غافي
وخنجرك مثل البلم بالليل طرٌه !!
ويانهر والحسره حسره
كون أشوفن سندبادك
شايل إعله إجتافه جزره
بكًلبي حسره...
كون أذب ثوب الحزن وآنه بشبابي
والحزن عالخد أســـــطره..
هيٌه حسره وأمنيه\ نسميها فكره
كون أشوفن سندبادك
شايل إعله أكتافه جُـــــــزْرَه
كون أشوفن مريمَك ما بيها لولـــه
ومن صِدِك نلكًاها عَــــــذرَه !!
هيــٌه حسره .. وعشره مُـــرٌه
والمراره إتزيــد للمايلكًه فـَـيْ
وينتجي إعله الشيب عمـــــــره

مشاركه رائعه منتظرين المزيد تحياتي لك

ليش في كل كتاباتك مراره وحسره والم ودموع ليش هذا التشائم بالحياه اختي رنا تفائلي الحياه مليئه بالحب واعتقد انتي بعدك في ريحانه الشباب على اي حال قصيده رائعه وجميله وعاشت ايدچ وانتي تستاهلين كل خير
اخوك الزير روماني

قصيدة في قمه الروعه اختي
ننتظر جديدك

تحياتي

رائعه وانتي مبدعه حقيقيه وصاحبه مشاعرنبيله ...تعرفين انتي تميزتي بهل للون من الشعر
ننتضر المزيد تقبلي تحياتي

كلاماتك رائعه اخي الغالي ولا تحرمنا من جديدك دوما

آنه من شكًيت زيجي إحتركَت إيدي
وانته من شكًيت زيجك شفنه كًمره...
تسلمين يامبدعه دائما متميزه