يا عراق الخير




يا عراق الخير يا اطهر وطن



صير أقوى من الوگت ومن المحـن



نمشي سنه وشيعه وبأمن وسلام



دم دفعنه وكافي بس ندفع ثمـن



كافي تجريح وحجي بالانفصال



نرفع من أرواحنا هموم الزمن



احنه ما نكدر نعيش بلا تصال



نفسي ما مخلوقة ألا بهل الوطن



وهذا باب الشيخ بيه شيعه علي



واحنه ندعو دوم يم باب الحسن



كل شعبنه اليوم صيف بالشمال



أيغني وي الكرد بالحب والشجن



وابن اربيل السكن بأرض الدليم



ما سمع من عندنا آلا الحســن



احنه روح بروح والغيرة عراق



والجروح ألبينه لابد ينسن



وابن بصرتنه ألحبيبه الاسمري



سكن تأميم الرمادي بلا حزن



عاش وي أهله وطلب منا الأمان



من هجوم إيران من مدفـع يرن



وبعض سأستنه يردون انفصال



وما أضنه يصير هذا اللي يظن



أصحي يا شعب العراق وكافي نوم



افتح عيونك على اللي ينفتن



البلد محتاج ألك لابد تچي



تحمل اسلاحك تقاتل كــل عفـن



الوطن كل يوم يتقدم أمام



وكل من عاف الوطن يرجع يحن



تبقى عين الله محروسة عليك



بينه حمرا بي اليسن هاي السـنن



احنه أهل الدين وأهل ألمعجزات



وبينه أبو الحسنين نايم بالصحن



يخسه كلمن حجه بتقسيم العراق



نقطع اركبته ونجفنه بها الجفن



تبقى أيد الكردي بيد ابن االجنوب



ونبقى نفس وروح نعلنه علن



انكول للجيران هذا ابن العراق



ونظرب الفيزا بوجهم وبلعن



نبقى متوحدين رغما على الزمن



عرب وكراد ومسيح وتركمن




سلام الدراجي

شرد اكلك يل كل حجيك صدك
او مابيه كل جلمة دغش00
0000000000000000000000
تسلم وتعيش وصح السانك وكلشي وكلاشي00
وكل حلو لجلك رخصته000
الزير العزيز قصيده في منتهى الروعه والله ولا ينقصها شيء سوى القائها بصوتك000
اخوك الصكر

كلك نخوه ومحبه وطيبه صح السانك على هاي
القصيده الرائعه والعراق الان بامس الحاجه الى
مثل هذه الاصوات ,,,,,,,,,,,,,,,,,
اخي الزير تقبل تحياتي لك .
اخوك محمد

الاخ العزيز الصكر شرد اكلك شرد اكلك راح اكلك مو حلو وادريك من الگمر احلى .اخويه الف شكر والله ايخليك ويحفظك والعائله اجمعين تسلم وتعيش

الاخ العزيز محمد السوداني انت ابو الطيبه والنخوه والف شكر اخي وان شاء الله ما نقصر لاجل هذا الوطن المجروح وانشافي جروحه بهذه القصائد

حس وطني رائع وياريت نسمع مثل هذه القصائد التي تتكلم عن الوحده الوطنيه

شكرا اخي ابو مالك وان شاء الله ما نقصر في كتاباتنا للوطن

قصيده ياعراق الخير قصيده وطنيه وعلى كلمن يحب الوطن يجب ان يرد لان ردودكم يمنحني الحافز للكتابه مع تحياتي للوطنيين

وماأصدك في عراقي والا عربي مايحب ارض الطهر

كل كلمة سطرتها يازير نزلت جمر لهاب بصدري

وصادقتهه دمعة من عيوني

العراق دمي الذي يجري بشراييني

والنخوة ماتنشره -- النخوة مطبوعة من الأزل بكلب العراقيين

سلمت يداك ياروماني يافارس الكلمات

وسلم الإحساس الصادق وهذا حس العراقيين

اشعر بصدق كلماتك العذبه الرقيقه نابعه من قلب صادق مليئ بحب الوطن شكرا لكي بارك الله بك اختي العزيزه

حياك الله اخي قصيده وطنيه رائعه بارك الله بيك

شكرا اخي ابو مالك على مرورك اللطيف ورمضان مبارك

شكر والف الف شكرا لك ياخي العزيز الزير روماني
والله ما قلت الا الصدق عاشت روحك الوطنية في حب العراق
وعاشت اناملك التي خطت اروع الكلمات
والعراق اه ياعراق يستحق منا الكثير
وبارك الله بيك اخي
ورمضان كريم

تحياتي الك اسد العراقي مرورك تاج ووسام على صدري وان شاء الله ما نقصر بشي للوطن الغالي الف شكر
اخوك ابو حيدر