شرد اسولف ياهو اليسمع حجينه
شرد اكول اندارت الايام وافترت علينه
وضاعت ابلادي الجميله وصار امرنه مو بدينه
صار بيد الغًرب كلشي وحيل بغدادي حزينه
لبست اسود تنتظر فرحه تمر بيهه وتجينه
اومااجاهه الفرح مره وفرهدوهه وعجزت اتردهم ادينه
لان احنه الكيفينه وبعد الهم صفكينه
ورحنه نركض من اجونه والهم اشكد هويسينه
هذا من حزب الافلاني وذاك من ذيج المدينه
تالي لمن عرفناهم بس حراميه لكينه
هذا يبجي اعله النفط وذاك بايكله سفينه
واحنه تهنه اندور الطيبين بيهم مالكينه
ياهو انظن بيه مناضل يطلع ايزغلط علينه
اشلون يابغداد ياهو الينكسر كلبه علينه
ليش هذا الظلم كله احنه كلولي اشجنينه
ردنه انغير نظام تالي احنه اتغيرينه
اتغيرينه ومابقت لاغيره عدنه ولاعقيده ولاسنينه
وكام ياهو اليجي بكيفه ايبيع بينه ويشترينه

الشاعر
صالح قاسم
هذه الابيات للحراميه الفرهدو بغداد ودمرت الحجر والبشر