الوطن دجــــــله وفرات


الوَطَن أنهــار ... الوطَن أســرار
الوطن قبٌــــــــــــة علي الكــرٌار
الوطن لمـٌة نشــامه إبحضن الأهـــوار
الوطن قلعه .. الوطن شمعه .. الوطن دمعه
الوطن دم الشهيـد الما خِذَل ربعـــــه
***
الوطن بستانـٌـه وصوت العصافــير
الوطن رجفة ضلع شايل مناشيــر
الوطن دعوة محٌمــد والمسيــــــــح
الوطن كًذلـَـة إكحيــله وشابكًه الريـــح
الوطن فرحة العيــد وبالمراجيـح
الوطن حيرة سلام وي التباريـــح
الوطن شمـس الظهر .. الوطن جــاي العصر
الوطن سلٌـة رطب مايـع
الوطن كلمــات أبو كًاطع
الوطن جعفر .... الوطن ناركًيلة مظفـٌـر
الوطن بصرة شناشــــــيل
الوطن عاشور وتفوت الزناجيـل
الوطن هور الجبايش والخضيـــــــري
الوطن ونــة إحضيري
الوطن صوت المناير .. الوطن مـوٌال زاير
الوطن ريحة أهلنـــــه
الوطن هيبة نخلـــــنه
الوطن جوع الحصيري ودمعة الســـياب
الوطن دَلٌة الكًهوة ولمٌـــة أحبــــاب
***
الوطن لعب الطفولــه والشباب
الوطن همسة عشكً مرسومه عالباب
الوطن جيران وبيوت وكًــــــــرايب
الوطن عريٌـس وتزِفٌـه الحبايــــــب
الوطن سـاكن كًلبنه
الوطن سِكــٌة دربنه
الوطن ماي الحيـــــــــــاة
الوطن دجله وفـــــــــــرات
الوطن دمعة فرح بأطراف الجفون
الوطن موجود خَـلٌي إشما يكًولـــون

***

منقوله

عاشت الايادي

ليش هو اكو احلى من دجلة والفرات

تخبل

سلمت يداك اخي على النقل اللطيف


هو العراق دجله والفرات

سلمت يمناك اخي العزيز
و مشكور على النقل و على اثرائك للمنتدى
تقبل تحياتي
اخوك سيرانو

شكرا لوجودكم وتحياتى للردودو

ما شاء الله مشكوور خيو
تحياتي