المساعد الشخصي الرقمي

مشاهدة النسخة كاملة : دارميات عن الوضع العراقي حديثة



النهرين
29-09-2007, 10:06 PM
دارميات عن الوضع العراقي






خاف أحچي ويكَولون سب الحكومه * كفاره يطّي النوب يرهن إهدومه

سولف يبعد إچلاي ويحلها حلال * إضبط إعصابك زين كون أنت رجال

ذب شصّك وبعدين تصفي القضيه * لو سجن سبع إسنين لو تطّي ديّه

مو شص وحكَ عيناك سلّيه ذبيت * خلي اليصير يصير خلي أهجم البيت

مرت علينه إسنين بس نسمع أخبار * بلكي إنقلاب إيصير والطاغي ينهار

ما قصّر الله إبهاي ودّه البطل بوش * داس إبطن صدام وتفلش الحوش

خابرت أمي إبساع يا يمه وينچ * باجر نرد للبيت خل تكّر عينچ

هلهلت يم الباب وإلتمت الناس * مبروك ألف عالخير راح إبن المداس

من غبشه كَبل الناس راحت على السوكَ * جابت حضن صمون عود إنّه ريّوكَ

شعلت بخور النوب وتبخر الدار * عام ونص إمتانين والقوري بالنار

أيست والأيام طالن عليها * وردت مثل ما چان تصفج بأديها

فرحتنه بالتغيير طلعت حلم نوم * مثل السراب وراح ما يبكَه للدوم

كَلنه الفرج والخير والحظ إجانه * مثل الي راد إكَرون كَصوا له إذانه

نفس الصفر والطاس ما بيّن الزين * بس رحمه مو ممنوع نبچي إعلى الحسين

كَالوا بعد سنتين ونوزع إبيوت * تاليها حتى المات ما عنده تابوت

كيّفنه كَلنه نصير مثل الإمارات * ماي وضوه وتبليط مو بس قرارت

حجّتهم إستقرار مامش بالبلاد * تانونه عشر إسنين ونضوي بغداد

ننتظر عشر إسنين نحمي إعلى جوله * نتعارك إعلى إبريج ما عدنه لوله

جا ولكم شتردون غير المسيرات * يتنفس الجوعان حي بعده ما مات

رحمه العلم سواه مجلسنه لونين * إقماشه من باريس وفلوسه بالدين

إمبارك وعالخير هاي العداله * صبح ومسه إيغنون عالبرتقاله

إلنوبه خاف التين من يسمع إيغار * وبساحة الفردوس يحتج على الصار

خل يحتج الرمان خل يحتج التين * مليوصه هيه وشاخ بالديره الكَطين

نومتنه هاي إهنا للچمري يهواي * لمن يرد إردود ويغرب الماي



تحياتي

خوخة الانباري
01-10-2007, 06:40 AM
مشكورررررررر اخي النهرين

تحياتي الك

ارشيف الفرات
02-10-2007, 10:47 PM
كلام رائع والله وصح السانكم بس ياريت تكتب منقول ذا ناقلهه الله يخليكم

cyranoo
12-10-2007, 03:48 AM
مشكور اخي على الكلمات الجميلة
عاشت ايدك
تقبل مروري
اخوك سيرانو

النهرين
04-11-2007, 06:30 AM
شكرن على الكلام الجميل

لاكن ممكن تثبيت الموضوع

..
الغربه سـاحة خيــل ومزامط إرجــــــال
واليطب بيها إبزود كون أصله خيـــــــــــٌال
.
الغربه وصــلة بور مابيــها ثمره
تترجٌه غيم الصيف يمطرله كًًــــــــطره
.
الغربــه زين وشين ذ ٌبت عليـٌـــــــه
والعيـــشه وي بـــذاٌت أكبر بليـــٌـــــه
.
الغربه من الناس راوتني أشكـــــــــــال
والكذب لو بفلوس ما ظنـٌـــــه ينكًًــــــــــال
.
بالغربــه خاوه الروح تنـْـوِخـِـــذ كًًـــــوٌه
واليرِد حكًًٌــــه إبسيف مو بالمـــــــــــروٌه

كريم العرافي



تحياتي

حسام الرسام العراقي
04-11-2007, 06:47 AM
أرسل الشاعر ناجح عنوز من كربلاء وعن طريق الموبايل هذا بيت الدارمي للشاعر محمد الغريب وهو في بغداد يسأله عن حالها عشية العيد:

بشرني كولي شلون حالتهه بغداد
نزعت ثياب السود لو صارت رماد؟
فأجابه الشاعر محمد الغريب:

لبست ثياب العيد رغم المآسي
أذتها ياأبن عنوز حرب الكراسي


شكرا جزيلا على الدارميات وتقبل مروري

ابو علي الصكر
04-11-2007, 09:44 AM
والله واحد كلبه ينفطر من يسمع هذا الحجي عن العراق..بس شنسوي هذا الواقع...

تعبير جدا رائع يا اخي النهرين

دلع البنات
04-11-2007, 09:47 AM
تحياتي على الكلام الجميل
ارق المنى

النهرين
01-12-2007, 05:02 AM
نخوة واصاله وطيب طبع العراقي
ولاسم ظل عنوان للغيره باقي



شكرا لمشاركتكم
تحياتي

ماجد العامري
09-12-2007, 08:01 AM
مشكور اخي الكريم على هذا الكلام الرائع والصراحة البيه احلى

مشكورررررررررررررررررررر
تقبل مروري

وائل العراقي
16-12-2007, 07:00 PM
:66 (46)::66 (6)::66 (46)::66 (6)::66 (46):

شكراااااااااااااااااااااااااااااااااااااااااااا

وليد المهندس
17-12-2007, 05:12 AM
جميله جدا مشكور