في القصيده ما يشير الى المعني



من كتلي زعل خوان
حسبالي تسولف من كلب والسان
تفاركنه وبعد بالخيط
ومصدك حنين الشاطي للسفان
ردينه وسالت عليك
كل باب بوكتنه الجان
والكيتك يمتعنيك
انت مضيع البيبان
كلت السمع غير الشاف
دنيه وكل وكت بوذان
فز حلمي وطويته وساد
المن ؟ كتله ضل حلمان
دك حزنه على ظهر العود
غنه بدمعة الخسران
شو بارديحضن الشوك
بارد يا هوه الخلان
يالبخيالكم دافين
مو كدكم صرخ بردان
يا سن الضحك مجبور
شلي بضحك اشا فك
والكلب زعلان
يالبشلونك استكفيت
( خرزات الصفر شاهودهن خجلان )(
ضنيتك جواك الشوك جويه ومسحت النيشان
ما مرك خبر صحبتي ويه الدفان ؟
ما مرك خبر كل يوم يندك للحزن صيوان ؟
واملاكي الوكت بس روح
وبطرك الصبر ومصرفن الذرعان
عابر عالسراط بهالبكه من الحيل
لا ذبيت حملي ولا كلت تعبان
وانه شما كلت يفلان
مو كطره على حد السيف
لم روحه وكله النسيان
لا هوه اليرد فحطان
بس طبهه ولكه الميدان مو ميدان
لا يفلان
اضل واكف كباره ويعبر الطوفان
مثل مراية اللاله شيطول الليل
قانع بالضوه ومتحمل الدخان

من وا دعتني ورحت جن تدري جاي فراك
دنياي عكبك خلت والسمه الواسع ضاك
يالجنه سجه وجدم جبناهه ساك بساك
يالشاركتني حلم ومن العيون انباك
يالجاسمتني عمر غربه وسهر وفراك
معقوله احن ما تحن واشتاك ما تشتاك

دك بابي ولو دكة كباره ونشد جذابي
دك بابي بعد ذيجه ثنيتي وذاك محرابي
لا اريدك تنشف بالجفافي دموع
لااكولن تهل بوجوه غيابي
ولا جرحي وسيع وجزر العطاب
كل ما كبر جرحي على كد عطابي
ولا لوم وعتب لا جلمتي اتغثك
ولو تسوه الحجي وتستاهل اعتابي
بس ردتك تهل والروح تتلكاك
تغلبني بهله وتطلع من اثيابي
تعلمت من اعاتب اوجع المعتوب
بس وياك يا جلمه الجزت نابي
اخشن خاطرك ؟ لا والملح والزاد
افرغص روحي وافتر عكس دولابي
واعثرهه القصايد لو تزل وياك
واخنكهه برسنهه وتطفه بكتابي
القصايد انت ابوهن ما يعيلن بيك
والعالت غريبه ومو من انسابي
يا ملح ابو معيشي وهوه البدعه بليل
سبحة داخل افترت على احبابي
الك رسم على حايطنه يلاكي الجاي
كل ما باب يهتز يلجم صواب
تعلم وكفتي اكباله وعتب كل يوم
وبوحشة اغيابك يوحشه اغيابي
يضحك من يشوف عيوني تضحكله
ويغنتب من يشوف الدمعه بهدابي
امس سالوني اوصفك كلت طيفك جاي
دليت على جدمك ريحة اترابي
واذا ما لاح لون بظلمة البيبان
دك باب الحلم خل حسرتي ابابي
وفززلي غنه بروحي ونسيته سنين
والكيلي بوذيه اتلوك لمصابي
البذيات ويه غيرك مال منهن
دفاتر كون يسون مالي منهن
شني طيوفك يصاحب مالي منهن
دمرني بطيف واكسب اجر بيه

دورت بسنين عمري
حجايه ما كايلهه غيري وردت اكلك
دورت بسطور امس كل ليل المهن
وارجع من المستحه بكد ما اجلك
والعمر رفكة قوافي
اكدار اكدرهن واكولن خاف ازلك
مالكيت
وعلمت عيني البواجي
وين ما طف ينذكرلك
دمعة ام غركان انوح
وكسرة العود انكسرلك
ادري كل التدمع عيونه بمصابك ينحسب يحسين خلك
بالمعاند ويه روحي
انجان عصرتهه الليالي
وبالشعر ما تنعصرلك
والله لطويهه على جفي
ومشعل بعاشور يحسين اشتعلك
روح ما تضوي على حبك
جا بهاي الروح شلك
كون بس عتبة ضريحك
كدرت اتلم بوسه مني
وسبح بالوجدان ضلك
انت باول دمعه ضاكتملح خدي
اتوطنت بالروح كلك
يا قصيده التكبر على اسمك ويبخل بيهه شاعر
يا شعر مر بيه هواك وما سجدلك
وانت خطيت الشعر بالدم
على رمال الطفوف
وصار كل الكون طف وناح لجلك
الطفل باقصى الدنيه شد عصابه سوده
وبيهه اسمك يا حسين
يا شهيد يا غريب
وحزن وياك على طفلك
تنذكر بالعطش وبدمع الليالي
وحسرتي بلم الشمل وبعيد شملك
من تضوي اببالي الغروب المناير
شفتك بطيفي مثل فرحة يتيم وكلت خلك
ضوه وترس العين ياعين التجوز
وهوه وما تنعاف ياريه التملك

بس انت اللكيت الضوه البالروح غيرك صرت ثوبه وما لكاني
عطش دربي وشفت موحانهه يموح بخل جاري الوفه وبارح سكاني
ذاك انه وتفوت سنيني وتروح واحسب لاهي بيهن عن زماني
كلهن عالصبر ذارعهن طروح واتاعيله غنه وهلبت يتاني
لكه بروحي الحزن بسمار باللوح تجوه الصبر من صبري وجفاني
صفيت بطرك عودي وحملي مطروح ادييه التهن واليكدر ولاني
ولية طالب ومطلوبه مجروح لوي السنبل تحت منجل لواني
وليل اصلبله جفني ويضل مشبوح واعيله على حيلي وما خطاني
عفه اليستانس برفسة المذبوح ولا مره عبرني وما جواني
اصيحن شرد اصيح الليل مفضوح خنكني امكابري وبالسكته اعاني
لا اعرف اشتكي وباسراري ما ابوح واموتهن تحت عكدة الساني
ولو فاح الصبر تحت الغطه يفوح وبالظلمه اذا دمعي اشتهاني
يوكتي البيك كل مذموم ممدوح يالعندك زمان الهم ثواني
تهت عن داري تيهة طيرة الدوح تسلومة شمس والليل اجاني
طبك جم باب جان بوجهي مفتوح وجم عش الحميته وما حماني
الوفه كتابه بثلج والكيته ممسوح عذرته الما نسه جروحه ونساني
يافي النخل ياريع السفوح يا اول حضن غالي اشتراني
اشتريني اردود حالت بي الجروح نكعت بدوه الغربه وما شفاني
مد ايدك واخذني بعيد ما الوح وارضه شما يصح يمك مكاني
كوخ اهلي ولا كل هاي الصروح حملني بحلوتي ومري وحواني
وتمر عثوكهم بالجوع مسموح حلال والذ من زاد الصواني
وماي اشراب بايت فوك السطوح زلال الغربه يزهي وما رواني
يا جا يا لعد يا حجي المملوح رطين الماصخ معشش بذاني
اعذروني غناي بصوت مبحوح امس يا ما ترست الليل اغاني
عبر وكت الغنه وطور الحزن نوح صرت الحم جرح يطلعله ثاني

تانيت وتمنيت وحلم طش على وسع البيت
كمت هنا وطحت هنا
وهن حدر جنحي بنومتك نا غيت
وهنا تحت نخلة دارنه الكاروك
وهنا هودتلك مهجتي ولوليت
وهنا شلت راسك مثل شتل الفيض
لبلابة جرف من نومك وشبيت
من شط الرميثه استخير الديره
ومن فا ضت شطوط العزم والغيره
مثل عودة السدره الطينك استنكيت
تدري اليطخ راسه ايلكفه جاري العيب
وانت من الزغر كمت الهه ما طخيت
تدري العيب شنهو وشنهو رفع الراس
وانت بكمر هاشم يولدي اتسميت
لسه جفوفك امطبعات عالحيطان
يوم الكمت وحدك تمشي واتخطيت
من زغرك كرهت زحوفك على الكاع
مثل ابن الفهد بجفوفك اتشلبيت
من زغرك فطرت على الصبر صومك
شلت هم الفقير الراح بالرجلين
وهموم الزغار الصابره همومك
من شفت الظلم خيم على البيبان
كفرت الصبر واستعجلت يومك
ومن نادتك كاعك ما ندهتك كوم
اعرفك من تكوم امشرع بزومك
واهيس راسي يتعله ويلوح الغيم
لو صار الحجي وتتسولف اعلومك
واذكرك من جنت تتنكل بممشاك
اكودك للشمس واتمله برسومك
وكل ما تبتسمعيني بوجه الحساد
وبعين الكلب يالبالكلب دومك
واطش ما على وجهك واطبك القرءان
كل ما تشب طول وتكصر هدومك
يالعندي غلاتك ما وصلهه السوم
لا رخصت ابيع ومشتره انجومك
اعز من اعز روحي وكل ثنايه الدار
يفداك اللبد والشرد من كومك
ويفداك التحنه بدم المعرسين
لا يعرف ضنا ولا يكدر ايسومك
واعز من الضنا ولا اضن وصف ينكال
بس الوطن اغلى ومحد ايلومك

هل انت الشاعر كريم الجسار نفسه اذا كنت انت اشكرك عل هذه الاشعار الروعه انا من عشاق الشعر الشعبي بس اذا تسمح لو تخلي اشعارك في مواضيع منفرده وليس بهذه الصيغه حتى لاتذهب خاصيتها
وشكرا لكم مره اخرى

بسم الله الرحمن الرحيم

الى الملال المحلق على منتديات الفرات
السلام عليكم
انها التفاته جميله منك ايتها الاخت المهذبه
لكني شبه محروم من الكتابه ولما يقرب من ذلك فمن القراءه ايضا
وليس هينا علي الجلوس امام الكومبيوتر لوقت طويل
اقبلي بساطة قصائدى اذا كانت تستحق
وشكرا مره اخرى


كريم الجسار

اذا لا عليك سانقلها وباسمك وتدلل شاعرنا كريم الجسار
لكن اتمنى ان يكون قلة جلوسك على الكومبيوتر هو مانع خير وليس مرض لاسامح الله
تحياتنا لكم

الحقيقه هو ضعف البصر ليس الا
شكرا مره اخرى
وشكرا مضاف على ما تبدين من مساعده

كريم الجسار

عندما يتقاعس الشاعر
تكتبه القصيده


ردت لي بزعل تنشد
وكالتلي القصيده اشبيك شو موذاك
كاسك ما فرغ وبصفنتك تبعد
ونفاضة جكاير فايضه على الكا ع
واتعصر جفوف وحسبه واتنهد
قلم مصلوب مثلي بحيرتك حاير
ورق يبسن اطرافه بحسرة الشاعر
والشاعر نهر والنهر ما يركد
شني الغيب ضوه هلالك\
شني الحسبه الخذت بالك تعد شتعد
خيم رفحه وعطشهه وما جزاك حساب
جا وكت اليصير طرادهن تكعد
كلت اله ينزرة عين هذا طلوك
والشاعر طلوكه ايهد
يطلك وحده ولا عونه تنفع بيه
لا جف لازمه ولا جابله اتولد
يدوس باثر جدمه بسجه ما تنداس
وايكصر نفس حد الخنك وايمد
يزت عصرات عصره خلاف عصره
ايزته واتعود
جن بجر القصايد مو توالي سنين
وطلوك البجر تالي العمر يضهد
يعسرن كلمه كلمه ويطلك وياهن ولا يركد
يلكطهن شذر وايطشهن بغربيل
يلضمهن يلا كي خيوطهن وايشد
لا مل لا جزع لا تعب من ممشاه
وضل مهره على طيفه ايكد
الشاعر ما عطش مره وكفر بالكاع
برطوبة الكاع الشاعر ايورد
يصيح بصفنة التعبان طول خلكك على الكال
غيمة صيف بس يرعد
يسامر دمعة ام وحيد
راح وحيدهه وكعدت بدربه اتعد
يرسم طيف للصبيان غناوة امل يزغار
باجر عيد وانعيد
يغني وهوه كله جروح
وبطور الحزين جروحنه اتهود
مثل طير البراري بذاك حر الصيف
متلكي السموم وللضوه ايغرد

يالتمشي على طولك والعيون تصيد
هم زين الدرب ملتهيه حساده
وانت الشايل من الحسن يا سبحان
من خله الكمر عالكاع يتهاده
وسبحان الجمع صورتك من كل لون
واختارك عذاب وحيره لعباده
تتمايل ترف واتخيلك طاووس
ما بدل ضواه من يوم ميلاده
مثل شذر الخناجر تلمع بكل عين
لو ضاك الدرب توكفلك اسياده
منو الكال اربعينك طفن بالوجنات
لو فات الربيع وذبلن اوراده
الخريف اشتمر عنك مو نسه يمر بيك
جذاب الخريف وجذبه ما فاده
هذاك انت الامس وصباك ذاك صباك
نجمك ما طفه ولونك على بلاده
وبعد شعرك الظلمه ابريسم وموجات
ما بين المتون وعاكده اعكاده
وبعد طولك رمح يا سمح حلو الطول
يا نصبة علم والشايله استاده
يعمر الهيل من تكبر سنين الهيل
عطره ايفيض طيب ويطفح زياده
غوه الكاشان بيك وطرزة الكاشان
تحله ويه السنين ورادتك راده
امس سالوني عنك هالغزال منين
كلت الهم نزر ويصيد صياده
تروه بديرة اهله وجاي مو عطشان
لاجوعان من برحي النخل زاده
بغدادي اجه وجاب الحسن وياه
وضلت خاليه من الحسن بغداده
يالمتبدي حسنك وانه طافح شوك
ناسيني الشعر واكتب على عناده
حركت اوراق امس والشعر حتى بنار
يتلملم حروف وينفض ارماده
يالصوتك غنه ودك اصبع ورن عود
يمه اتكسرت ريشة العواده
يالكلك ورد يالتزهي مثل الطيف
حتى الورد منك يطلب امراده
هاي عيون لو حيره وتتيه الراي
بي هموم جيل وهمهن زواده
وعكدة حا جبك جرة قلم لوميل
ضاكك بالكحل واتعودك عاده
وهاي رموش لوكلة عرس لو ليل
خيم على خدودك للنده اوساده
وهاي اكلادتك تلمع بصدر الثوب
لو ضي ركبتك يلمع بالكلاده

يشدهة بال
لو كلشي بغرامك ينحجه وينكال
جا صفيت الك كل الشعر بيتين
واكتبلك غزل ينوزن بالمثقال
وانظم لك شعر ما كالته العشاك
واحلف لك يمين اجانه كبلي انكال
واغنيلك كثر ما ذوبني رموش
ازف الهن زماني بكل صبح موال
يالشلت الحسن يالخذت منه العين
كثرتالحسن واصبح ولا ينشال
بيك من الربيع ومن خضار سفوح
بيك من النسيم وهوه ايرد الروح
وبيك من الصبا طويره وربت بجبال
كل ما تعطش ويتعب جنحهه الريح
تسبح بالضوه وتشرب من الشلال
يالون الفجلار كبل الشمس فضه
فز الورد بيك وشرب واتوضه
وجمع روحه عطر وبفي كذلتك سال
وتلوذ الفراشه بلونك من الليل
ياللونك دوه ولون الفراشه خيال
يا نجمة صباك بو سع ضي العين
تزهي بوجنتك وبفيه يزهي الخال
بيك الزينه تكمل بيك يكفه الطيف
لاكثر البنون ولا كنوز المال
بس انه يشدهة بال
تهوه امغازلك روحي ويردهه الشيب
خوف على الوقار وحجي الناس اشكال
يالماعلت بي وليش بي تعيل
هاك بلايه عيله الجمل والجمال
يالفدوه الك كلشي وحتى تالي الشوف
عمي استر علي يالماتعرف الحال
تاخذني بجهل وانه بغزير الشيب
واتلاوذ بصبر وبي حسنك عال
تتفرهد اتفرهد روحي لو مريت
واتطشر نذر كل ما تهل هلال
حتى اغصان عمري بلايه هويه تميل
واتنز من هرشهه انجان خصرك مال
واغرف من سرابك بين عين وعين
واشمر عن سرابك شمرة الخيال
واتكاوه ويه عيني وتر ليك اردود
تستانس بنارك مثل صبر دلال
خلف الله المناذر ساترتني وياك
جا فضحتني عيني بلمة العذال
يا خفة الروح اتماهلي شويه
اشوف العود مد روحه وكبر فيه
وصدك من كال
لم روحك يماتكدر
عشك تالي العمر جتال
لم روحك يمتبعثر
عشك تالي العمر جتال

يا ملاك اثنين صارن يا ملاك
وحده جزه وحده خليهه برضاك

اقصد القصيده طبعت مرتين فارجو الغاء الاولى وترك الثانيه شكرا

بوحشة السكته تلاكوا
شمعه مشتهيه ضواه
وشاعر جروحه جديده
هي تخلص دمعه دمعه
هوه يخلص جلمه جلمه
ودمعة الشاعر عنيده
يختنك بالحسره واتفر ويكضهه
والحجي المدفون يتشلبه على جيده
اتعانده ثكال القوافي
ويشتعل دمه بوريده
اشتعلت بصفنته الشمعه
وانطفت من رجفت ايده
وهذا طبع الشاعر شما يحترك يكتب قصيده
يا قصيده القصيده الما تذل
والقصيده المشت بالسجه السراط
وما رضت عنه تزل
والقصيده الرفرفت طيرة مناره
اتدور وي في المناره وماتمل
والقصيده الخضرت من عطش رفحه
وحملت الما ينحمل
والقصيده الهلهلت بعجود اهلنه
ولمت اذار الشمل
وصاحت بكل حيل اهله
اليعدل الما ينعدل
انه خبزه شعير ستوهه السموم
اتعور سنون الرده وما تنوكل
وانت خبز اركاك واتطركت حار
منين ما تنكظ سهل
لا تدك راسك براس المشتريك
وتحمد المايل عدل
القصيده الرخصت بسوك البلاش اتضل رخيصه
والقصيده الغاليه بسوك السوالف
مثل نبضات الكلوب الما تجل
ولو نساهه الوكت واتعده الزمان
اتضل عزيزه ونار حداد السيوف
شما نستهه الريح نفخه وتشتعل
والقصيده التشبخ على الليل الاسود من تحب
خطه شاعره على حيطان السجون
وصارت اليوم على بيبان المدارس تنكتب
كالهه وجفنه على جفه
وكابل الموت الرده الماينجهب
كالهه بوجه المنافق والصبغ وجهه جذب
طيني مو عبره وتسدهه وتحرم الماي العذب
انه شتلة جرف طافح بيك وبلياك اشب

http://www.up7up.com/pics/g/14/1178900394.gif