المساعد الشخصي الرقمي

مشاهدة النسخة كاملة : دكيت باب الوطن



عراقي الى الابد
02-07-2007, 06:52 PM
دكيت باب الـوطن
وابوابه مسدودة

ومن فتح بابة انزلن
دمعات بخدودة

صب الدمع واشتكى
من دون ما يحجي

وصعبة علية من شفت
عين الوطن تبجي

آآآه يا وطنا الحلو
راحت حلاتك وين

راحت وصارت قطع سودة عل الحياطين

آه ياوطنا الحلو يا زين يا غالي
مو انت الاول جنت ليش اصبحت تالي

الناس جانت كبل تتوسل اتشوفك
وهسة صفت بالعكس تتوسل اتعوفك

ابجي على بلدي
ابجي على بغداد
عل المتحف ابجي انا على التاريخ والامجاد

ابجي على الصحفي ابجي على الفنان

وعلى الماي ابجي انا وعلى الاشجار والاغصان

ابجي انا على القتل ما بين هل الخوان
وابجي انا على الغدر وعلاسة الجيران

ابجي على مذهبي وابجي على ديني
عل القبلة صار الذبح بيد المخاويني

نذبح بعضنا ذبح والاجنبي والمحتل
نتوسلة بالبلد يبقى ولا يرحل

السبب خوف الشعب من حرب اهلية
ومن معركة قادمة سنية شيعية

المن يكون النصر والمن يكون التاج
ويا مذهب الينتصر وتحجله الحجاج

من يا ترى المنتصر لو فاض بينا السيل
ولكم ترة المنتصر امريكا واسرائيل

هذا العراق الحلو بيه الزمان اندار
ولو نار هسة طفت تشتعل باجر نار

الليل ذاك الحلو ليجنن ابغداد
اصبح يضيك الخلك وايامه ما تنراد

والماي ذاك العذب ما عاد نفس الماي
روجاته يبجن دمع واحزان بيه هواي

الصار بينا وجرى ما يخطر على البال
ومو كل دمع ينبجي ومو كل حجي ينكال

بسبب وبلا سبب نتكاتل على المال
ونسينة عدنا وطن وجروح بيه اشكال

هذا العراق الحلو ما غيره حبينا
وبغداد بيت الاهل البي تربينا

شاف العراق الحلو من الهموم اشكال
وياما انجرح هلوطن بس ما بجت عينة

ونصحونة ياما بشر نرحل لغير بلاد
وما عفنا هذا البلد ونحبه ظلينا

بس خايف يضيع الوطن ما بين هذا وذاك
وشيعوضة النا الوطن لامال لا املاك

نحتاج مال الدول مال تهدينا
بس لو طلبنا وطن ياهو الوطن ينطينا

بعد ما جابته امه اليمسجن يالعراقيات

حلوات الطبع واخلاقجن حلوة
والرايد يمسجن يالعراقيات مايكدر ويغديلجن فدوة

انتن للعراق احزام يالحلوات
انتن شوك ياخذنا ويرد بينا

احنا بشوفجن ياعيني متولعين
وياجن عمر عشنا وتربينا

بالجبهات ما بجانا طاري الموت
بس فراكجن هوة الي يبجينا


عادل محسن

اميرة الليل
02-07-2007, 10:09 PM
الله الله على الشعر الرائع
اخي هذا شعر يخبل والله
ابدعت بكل معنة الكلمة و انشألله الك كل التوفيق

و تحياتي

cyranoo
03-07-2007, 12:30 AM
الحقيقة كلش رائع هذا الشعر و كلمات توخز بالصدر
خصوصا هذه الكلمات :
آه ياوطنا الحلو يا زين يا غالي
مو انت الاول جنت ليش اصبحت تالي

الناس جانت كبل تتوسل اتشوفك
وهسة صفت بالعكس تتوسل اتعوفك


شكرا تخي لانك اتيتنا بشعر من اشعار الفنان و الشاعر العراقي
عادل محسن و هو مشهود له بالشعر الشعبي الجميل

تقبل تحياتي
اخوك سيرانو

ارشيف الفرات
26-08-2007, 02:32 AM
شكرا لكم اخي عراقي وينقل لقسم الشعر الشعبي

ارشيف الفرات
28-08-2007, 11:39 AM
الاخ الفاضل عراقي الى الابد

كلمات تنبع من احاسيس مجروحه
وذوق رفيع ونبض قلب رقيق
الف الف شكر لهذه الكلمات الجميله دمت بالف خير