شيصفيك
شيصفيك والغربان تفتر بيك
شيصفيك وأصبح سافلك عاليك
شيصفيك وچفوف الخيانه بكل شبر ياموطني أتانيك
شيصفيك ومن آل وبني متحزمه كلهه أعليك
شيصفيك وأجت كل الدول برهابهه أتلاويك
وحدك تحترگ عافوك وسط النار
ويتناثروصل من رايد يطفيك
ياملك المجازر فرهداك الموت
وحمامات دمك غرگن چاليك
يامعدن حضارات أنبياء الله
يامهد النبوه المحد يوازيك
ياالآدم ضجيعك نوح والكرار
أنته أصل الحضاره ومنهو يوصل ليك
ياليل السحر من بابل لآشور
عگب بيض اليالي أسودت الياليك
شيردك حضاره أتمدن التاريخ
وبنيانك تهدم من بعد يبنيك
شيردك وطن ياسيد الامجاد
وأنته من الچتاف أمبترات أيديك
شيردك عراق الخير يابو الخير
وأنته أتفرهدت من راسك لرجليك
ناسك بالحيا ياوطن مدفونين
ويمر الموت لمن ينذكر طاريك
يالگاعك مگابر فرهداها الخوف
وموت بكل شبر ياموطني أيلاگيك
جثه أبطن جثه وموت ياكل موت
ومسافاتك رصاص وعالدمه أتمشيك
ياحبل القنابل عالرگب ممدود
كل لحظه أنفجار وكارثه تمر بيك
ياجسر المذابح ياحزن عاشور
صرت مسرح جريمه الوادم أتسميك
يابحر الجثث تنزف دمه بكل يوم
وچفوف الغدر تستقر متخليك
باعوك الي چانو بسمك ينادون
ومدري ليايزيد أچفوفهم تهديك
ياشعب العراق الصابر المسكين
ياراعي المصيبه المحد أيواسيك
أشطبهه الاسماء وضل بدون أسماء
شد أحزام جرحك وأسترد ماضيك.