معاناتك احبك
معاناتك احبك مكدر انساك
ومعاناتي تحب غيري وتعزه
معاناتك تحير بأكلة اليوم
ونا هذا الفقير غذاي خبزه
عدوك من يدك ماافتح الباب
وعدوي اشلون بحضانك تلزه
ادك طبول بلجي اتكوم يحمود
وجنت انت التكوم بغير نغزه
جنت اذن التفرزن كل الاصوات
الجذب منهن على حبالك تفرزه
تلاوين الحجي بلسان جذاب
ميلبس الكلام ثياب مغزه
حرز شديت بيدك اعبر الليل
الشهم نور الصباح يصير حرزه
شنو تشرب لهاتك مالح الماي
والماي العذب ريجك تبزه
جوانينك طفت من دمع العيون
وسعير حشاي بسمومك توزه
على تالي الوكت لصير كاروك
تكيد ريح شماتك تهزه
وذا سرك تكوله بلمة اصحاب
تصير الكاس نوب ونوب مزه
لاسلم جرح لصفاح سجين
اذا طاب الجرح عمدن يحزه
كرم بيك التكابر اشكم اعداك
وعلى صدر اللئيم الرمح غزه
امس رادو خروفك ليش منطيت
غصب وي الخروف انطيت جزه
اذا ذيب اليخوف طاح مجتول
وشفت فوك الجروح خدوش معزه
تأكد بالسما ما ظلت اصكور
الصكر يمك يطير بجال وزه
بعد ما كول هين هناك عنوان
اشك بغيض عنوانك وجزه
لبس ثوب الحيايه يغير اللون
اذا جلدك نزع فد يوم عزه
ونا بضيجي طلبتك عون يحمود
وردت منك تجيني بسيف حمزه
يلبراسك نبع صفين الكرون
وعكال الشرف بالكاع طزه
دواليبك عكس فرن بالعيوب
يعيبك كل عيوب ابليس خزه
ادك طبول شو ماجيت يحمود
ضميررك وين ما حسيت وخزه
يحمود الجرح جرحين هاليوم
جرح بغداد جرح هناك غزه

جميل يا يوسف
اختيارك للقافية اختيار شاعر ذكي
ومقتدر والصورجميلة
تسلملي يا مبدع

الاخ ابو عقيل من فيضك نستمد العزم
انت الاروع والابدع
دمتم

الله الله
امكانيه رائعه
وكنت مبدع حيث انك
اخترت قافيه قل العمل بها
من نظرائك الشعراء اهل
الباع في هذا المجال
ولذالك ساقف واصفق
لسموك

عاشت الايادي يالعزيز
قصيدة غاية بالروعه
وابداع من بعد ابداع
تحياتي لشاعرنا المبدع
يوسف الذهاب
تقبل تحياتي

جناب الشيخ الغالي
الشعراء الكبار وانت منهم بيهم البركه وكل
الابداع وهمي وهدفي امتاعكم مثلما قدمتم
وتقدمون الاروع من الشعر الهادف المعبر
حفظكم الله قلما بمداد ذهبي

العزيز الزير سالم
رأيك يعنيني فانت عين ناقده مسلحة بأدوات
المعرفة الجمالية للنص وقراءة تفاصيله وتصويب
مساراته احييك والاداره العامة دمتم