المساعد الشخصي الرقمي

مشاهدة النسخة كاملة : وطن ثاني



@/رفيع التهذيب/@
07-03-2007, 11:11 PM
لحدمن تظل ياقلب.... مهموم وتعاني؟
هذا الوطن مو الك.... دور وطن ثاني
ماذكر تعبي اله .. ولاموت خواني
ضحيت اله بدنيتي .. وعمري واهل بيتي
تاليها وبكل صلف .. ينكر عراقيتي؟
رندا رحيم الاصل وفائز الكيلاني؟
وانا طلعت اجنبي .. ومشكوك عنواني؟
* * * * انا الكنت بالمدن .. انشر مناشيرك
وبقلبي ويه النبض .. نامت تصاويرك
عاشرتك من الزغر .. ما عاشرت غيرك
حاميتك من الغدر .. ومن الحراميه
بسنيني شلتك امل . واحلام ورديه
حبك مطر مانشف .. من غيمة اجفاني
وصورتك اروع نغم .. ياوطن بالحاني
تالي اطلعت اجنبي . ومشكوك عنواني؟
*****
لغز بمحبتك صرت .. مو سهل تفسيري
بالهورحدر القصف .. طكن شواجيري
وبروحي ما فكرت .. بس بيك تفكيري
وياك ابيض جنت .. ياموطني وصافي
واسمك برغم الالم .. مافارق شفافي
انطيتك بقايا الفرح .. ورضيت بحزاني
تالي اطلعت اجنبي .. ومشكوك عنواني؟
طب بسواجي القلب .. طب دور الوجدان
ماتلقه غيرك عشك .. ملتف على الشريان
وسأل عليه الجبل .. وعيون كوردستان
جم ليله نام الدمع .. مخنوك بعيوني
ومابعت منك شبر .. لو غيرت لوني
صابر واشيم الجرح .. والنزف صفاني
تالي طلعت اجنبي . ومشكوك عنواني؟
انا بن اول شهم .. طب ثورة العشرين
وتشهدله سوح المجد .. واهل الشرف صوبين
ومن اجلك استشهدوا .. خوتي حسن وحسين
رضعتني طيب وعشك .. امي العراقيه
وبقلبي شايل الك .. مليون جنسيه
زامطت بيك الدهر .. وجيوش عدواني
تالي طلعت اجنبي .. ومشكوك عنواني؟


للشاعر المبدع
عمار الوائلي ابو زيدون


ارجو ان تنال اعجابكم
:66 (46): رفيع التهذيب:66 (46):

kazim
13-03-2007, 11:42 AM
رووووووووووووووعة

عاشت ايدك

اوزجان
15-03-2007, 09:48 PM
تسلم اخي رفيع التهذيب

تحياتي

ارشيف الفرات
16-03-2007, 04:26 PM
قمة الروعه في ما تختار يااخي رفيع التهذيب
تقبل مروري

ibn-BAGHDAD
17-03-2007, 08:29 AM
عاشت الأيادي أخي رفيع التهذيب.

ibn-BAGHDAD

@/رفيع التهذيب/@
17-03-2007, 05:10 PM
تسلمون احبائي على مروركم الرائع لقد عطرتو الموضوع بمروركم
ابن بغداد لك تحياتي الاخت ملاك تسلمين يا روعة اوزجان تسلم يا عزيزي انتة الاروع
كاظم تسلم عزيزي ايدك اللي عاشت

اخوكم
رفيع التهذيب