المساعد الشخصي الرقمي

مشاهدة النسخة كاملة : التصاوير / حوار مع الشاعر الاديب علي الرماحي



عباس الفرطوسي
19-09-2010, 08:05 AM
التصاوير
عباس الفرطوسي

أجت وتريد من عندي التصاوير
وتگلي أحرگ مكاتيبي على النار
يمن بعتيني غفله ورحتي للغير
دخلي الي ولو فد رسم تذكار
ما فكرّتي بيه وگلتي شيصير
ولو ما اضن يهمچ صار .. ما صار
يا حلم الطفوله الخضّر زغير
أنگطع چمري وانه الحسبّته گنطار
الصور بگليبي مدگوگه أبسامير
وياهو اليشلع من الگلب بسمار
أتطمني تضل أسرارچ أبير
وتضل رسايلچ عندي أغلى الاسرار
خلي أسمي بدليلچ خافن يحير
أنه الحيره وبدوني شلون يحتار
صرت شجره ووليتيني بمناشير
وخليتيني صرت وگود للنار
طلع حبچ مثل كلمه بطباشير
وآنه الگلت دوم وچذب تندار
بس مني أبد ما طلع تقصير
وشوفي بعينچ اللي طلع غدار
دخلي العشرتي وياچ تقدير
وگولي هم بشر من يعشگ يغار
روحي وداعت الله ادعيلچ بخير
حيل ويالگلب ما عرف يختار


الجواب / للشاعر الكبير علي الرماحي

القضيتك ما أضن يحتاج تفكير
وتدري شگد مثلها بها الوكت صار
عليش الباعني أحفظله التصاوير
وأخليله بحياتي بعد تذكار
يمن بالشعر عندك خوش تعبير
شفت نار بحياتك تنطفي بنار
نار الذكريات بروحك تصير
وتدگ بظلوعك من الندم بسمار
بعد لاتضن بال الاسمك تدير
وتندّب بس رجلها كون تحتار
كونك صدگ ردت اوداعها بخير
أنطيها اللي تريده أعليمن تغار
تدري الكاتبه الله لازم يصير
بعد ماضن تفيد وياها الاشعار
الحبها حروف مكتوبه بطباشير
لاتحفظ صورها تنمس بعار
تعرف البير شنهو وسدة البير
أبلعها ونام ما يحتاج نغّار
يبو گلب الغشيم عليك بالجير
چم مره بغرامك تلعب قمار
فقير وخاطرك شبعان تكسير
العتب شتظن يرد الطير لو طار

الشيخ ابوحيدر
19-09-2010, 08:13 AM
احسنت على روعة الانتقاء
والتعبير الغالي لك جبال
الود والورد

الكناري يونس الجبوري
19-09-2010, 09:31 AM
قصيدتك رائعه جداً وكذلك قصيدة الاخ الشاعر الكبير علي الرماحي
صح لسانكم والف شكر على اتحاف الفرات بمثل هذه الروائع
لاعدمناك اخوي عباس
طال عمرك
تحيتي لك

محمودالفريجي
19-09-2010, 09:50 AM
احسنت في الاختيار االموضوع وبوركت شاعرا انت ومن اجابك الاخ الرماحي

تجربه جميله قل نضيرها

عباس الفرطوسي
20-09-2010, 05:57 AM
احسنت على روعة الانتقاء
والتعبير الغالي لك جبال
الود والورد

شكرا لك اخي ابو حيدر على جميل مرورك ... اسعدتني بذلك

عباس الفرطوسي
20-09-2010, 06:00 AM
قصيدتك رائعه جداً وكذلك قصيدة الاخ الشاعر الكبير علي الرماحي


صح لسانكم والف شكر على اتحاف الفرات بمثل هذه الروائع
لاعدمناك اخوي عباس
طال عمرك

تحيتي لك


تستاهل الفرات واهل الفرات الجميل بل والاجمل .... حبيبي الشاعر الجبوري لك مني باقة ورد على مرورك الجميل الذي له اثره البالغ في النفس

عباس الفرطوسي
20-09-2010, 07:04 AM
احسنت في الاختيار االموضوع وبوركت شاعرا انت ومن اجابك الاخ الرماحي

تجربه جميله قل نضيرها
محمود الفريجي شكرا لك تقبل تحياتي .. وتحيات الشاعر الرماحي .. دمت بود

شوك الشفايف
20-09-2010, 05:52 PM
الله ياجميل على هذي المفردات الرائعة
شكرا لك...مع حبي

عباس الفرطوسي
21-09-2010, 07:26 AM
الله ياجميل على هذي المفردات الرائعة

شكرا لك...مع حبي


شكرا لك اخي العزيز على اطرائك وجميل مرورك .. تحياتي