شجم مره أحذرك من اليحرسون
وقرالك درس يفصم ظهر ناكه
وكتلك: دنيتك دارت ابعكس الريح
والشرجي بشمال ابغلط يتلاكه
الحرامية بعد ماكاموا ايبوكون
لان حراسنه صاروا البواكه
وغفوا اهل التفك.. خدروا وشبعوا نوم
والغمان وسفه اصبحوا بواكه
واليحجون دغري السانهم مخلوس
والسن الخرس افصحن لباكه
والمتعففين الصبر الهم زاد
والمفطح للمخلصينها الواكه
والرتبه اصبحت لمخبخبين الثوب
واهل الزود حصتهم المشراكه
والمخنوك لوتنطيه هوى الريتين
الك يتنكر او يركض الخناكه
دنية اترادت ويه اهل الصدك ياحيف
وصارت ويه اليجذبون صداكه
وصعد لام العلى الماعنده نص اجناح
والحر مابقت بجناحه سباكه
شتعاتب يكاظم.. موش وكت اعتاب
وتساوى الكناري بنغمة الغاكه
انحوه بستان تعبك والثمر باكوه
واغصانه اذبلت وانسحكت اوراكه
وبيرك والدلو . منجلك. والمسحاه
تتباره الذمم كلمن على افراكه
ونته الوحدك والندم يعلس بيك
وكلبك من سعير النار لهواكه

واذا تابوت خلك اخرس انته تكول
هم سامع نطق تابوت بشواكه؟
والشخص البسيط اشجابه للمغرور..؟
كلمن على كده ايجيب مسواكه
مد رجليك يبنادم بطول اغطاك
مثل الجادر اليلتم على ارواكه
واوزن بيك عقلك والاشواك البيك
مو تكزل ابوحده او مشيتك عاكه
وهاي اخر نصيحه وعدو احسبني اوياك
ياصاحب تره دنيتك مزلاكه.



للشاعر المبدع مهدي السوداني

انتقاء بطعم العسل

مزلاكه الوكت والدنيه نص بسمار
بالك تمشي حافي كَلت مزلاكَه
جميل مانثرت لك كل الود
نقل ميز يالغالي

الحرامية بعد ماكاموا ايبوكون
لان حراسنه صاروا البواكه
وغفوا اهل التفك.. خدروا وشبعوا نوم
والغمان وسفه اصبحوا بواكه
واليحجون دغري السانهم مخلوس
والسن الخرس افصحن لباكه
والمتعففين الصبر الهم زاد
والمفطح للمخلصينها الواكه
والرتبه اصبحت لمخبخبين الثوب
واهل الزود حصتهم المشراكه


الله عليك ياشاعرنه الكبير على هذي الروح الوطينة
مع حبي واعتزازي لك اخت فاتن سلمت اناملك الجميلة.......

لكم جزيل الشكر والامتنان على مروركم ووضع كلماتكم الجميلة

فاتن وهيب الغائبة الحاضرة دائما تمتلك ذوق واحساس باختيار القصائد المميزة

اختيار جميل
دوم هالابداع
تحياتي