امس جنت اعله بالي وكلت احاجيك
وشفت رقم اتصالك بالموبايل
دست اوكي طلع جاري اتصالات
شفت مكتوب يم الرقم راحل
شفت كطرات دمك تحجي وياي
واثر طعنات بخدود السنابل
حزن بستان صبح تمره مبيوك
اوصدر امر اعتقال اعله البلابل
شفت تحصد بشر ماتحصد الكاع
لان مسمومه من غبشه المناجل
بدت تبجي الشوارع كبل العيون
لان نصبت جوادرهه المنازل
لكينه احنه الشوارع تمشي بالناس
كبل للموت محد بينه نازل
اذا هاليوم اشوفك باجر اشلون
لان باجر اظنه ويانه راحل
كبل لمن تموت ادور الموت
هسه الموت حد البيت واصل
كبل يعرف خطيه اويرجع الموت
اذا شاف اليموت ابحضنه جاهل
امس قاسم وبوي او امي اليوم
اولحد هاليوم عدنه الموت نازل
اذا الميتين كلهم صلو الليل
بعد شيفيدنه انصلي النوافل

صادق حلو وعاشت ايدك
تحياتي