انها احلامي المتواضعه
-------------
في عالم تكسوه الونــــه---عايش متعذب محتار
ابحث بين اشلاء افكاري---بلكت ألكه أي تذكار
بلكي اكدر اذكر احساسي
صــــار سنين متيه ناسي
حقي العالم كلش قــــاسي
يقذف حلمي بوسط النــار
---------------------
احلم بجفوفي التعبانه---جف الحلوه يلاعب بيهه
واحلــم اتعلق بنسانه---مـا تغدر أبيض ماضيهه
احلــــــــم بينه العمر يعدي
واحنه انعيش الحلم الوردي
مـــــاريد اكعد دمعي بخدي
مــــن حلمي مشتت الافكار
----------------------
احلم اسمع ضحكة أمي---ماريد اسمع منهه احزان
شكد اتمنى اتذب الاسود---مــا شايفهه بثوب الوان
شكـد اتمنى اسمعهه تغني
تشيل همومي الثكلن عني
مـــــاريد امي تخبط وني
وي ونهه وتقر الاشعــار
-------------------
شكد اتمنى الكه الجنه---بأرضي وعريان الكا عيد
عـــايف كلمة لاتتمنى---يكلي اتمنى وكــول وريــد
تـــــدرون شأتمنى وأطلب
كــــــــأساً مملؤاً فالنشرب
راحة بال وشوك ومطلب
مــــــــاريدن ضالم جبار
يقذف حلمي بوسط النار
بقلمي
علاء فاضل العقابي

احلم بجفوفي التعبانه---جف الحلوه يلاعب بيهه
واحلــم اتعلق بنسانه---مـا تغدر أبيض ماضيهه
عاشت الايادي نزف رقيق
روعه تحياتي

طالب الناصري
مرورك اسعدني شكراً على هذه المشاعر الطيبه
تحياتي

اخي علاء العقابي
امنيات جميله وبسيطة في مضمونها نأمل ان تتحقق
وكما قال الشاعر
ما اضيق العيش لولا فسحت الاملِ
قصيدة جميله وكلمات نطقة عذوبه وعزفة على قلوبنا بأحلى الألحان
امنياتي ان تتحقق ما تتمنى

احلم اسمع ضحكة أمي---ماريد اسمع منهه احزان
شكد اتمنى اتذب الاسود---مــا شايفهه بثوب الوان
شكـد اتمنى اسمعهه تغني
تشيل همومي الثكلن عني
مـــــاريد امي تخبط وني
وي ونهه وتقر الاشعــار





حقيقة هي والله احلاما متواضعة
ضيعتها قسوة الحياة وشوهت حتى ملامحها

علاء العقابي
لقلمك عذوبة ممزوجة بغصة ألم
لروحك الف تحية وسلام
ولأحلامك أطيب الاماني بأن تتحقق
ولمدادك نقف صفا لنصفق ,,,,
كل الشكر لك عزيزي وننتظر سيلك القادم
مع اطيب التحايا

لطالما جعلتني ردودكم الجميله
مجبر على ان اقدم الافضل
لانني اعلم انكم ذواقون خطرون
شكراً على هذه الردود الجميله وهذا الذائقه الشفافه

زهير العقابي
حلمت بها وانا اعلم بأنها لن تتحقق
شكراً لك