السلام عليكم ورحمة الله وبركاته



اخواني واخواتي الاعزاء


اكيد الكل سامع بشركة لا زين mtc اثير سابقاً


اكيد اكثر العراقيين مبتلين بهذه الشركة :66 (75):



اكثر شركة ترسل رسائل مجانية


طبعا مجناية بس بالحجي
اذا اشتركت بوحده من الرسائل ينعل سلفه سلفاك


بعد ما تلحك تستخدم الرصيد لان الجماعه يسوون طريقه علاجيه



دولارين بلع قبل الاتصال ودولار بعد الاتصال



نص دولار قبل الترميش ونص دولار بعد الترميش



والمكرود الكارت تخليه على نص كوب ماء وتشربه وانت الممنون




نجي انشوف الرسائل الي دمرونه بيه




الرساله الاولى



:66 (75):انطح راسك بالحايط واحصل على 1000 دولار جذب اتصل على الرقم 3322



الرسالة الثانية



اشمر روحك من السطح واحصل على 3000 دولار فلوس الفاتحة اتصل على 2400



الرسالة الثالثة



اظرب زرك بالحمام وخل تتكسر مفاصلك بالكاشي واحصل على 500 دولار اتصل على 1234



الرسالة الرابعة


فرصة العمر تشاهد مبارات كأس العالم من ملعب الشعب اشترك واكتب اسمك واسم ابوك وامك وعنوان بيتكم وبيت الخلفوك وبيت جيرانكم اتصل على رقم 9060




الرسالة الخامسة



استبق الاخرين واحصل على 100 دولار كلاوات من حجي عطعوط الله يرحمة المتوفي 1890 م اتصل على 4443





الرسالة السادسة




تريد تعرف برجك اليوم كل ما تتصل اكثر كل ما راح يطيح حظك اكثر اتصل على 5400




الرسالة السابعة




تريد 1000 لتر بنازين اتصل على الرقم 1119 وراح توصلك ال 1000 لتر برسالة مع قوطيه دهن فوكس



الرسالة الثامنة



تريد ينهجم بيتك وبيت الخلفوك اشترك ويانه بخدمة زين سمعني واسمع ياس خضر وهو يغني جذاب دولبني الوكت اتصل على الرقم 6456




والحبل على الجرار من الرسائل التعبانه


واتحده واحد يجي يكلي ربحت من شركة زين كله جذب بجذب
ومجرد سرقة اموال المشتركين المساكين



باليوم توصلني اكثر من 10 الى 15 رساله


ادري تعرفوني شجلبتو بيه قابل اني حصن الخيضر :66 (124): تورطت اشتريت خط زين مو شعلتوا ابو صفحتي
حرت وين احجي والمن اشتكي
اتصلت بيكم اكثر من مرة كتلكم عمي جفوني شركم من الرسائل وماكو فايده
عاد كلت خل اكتب عليكم بالانتر نت بلكت واحد منكم يقرأ الموضوع والله يهديه عليه ويوقف خدمة الرسائل
واذا تريدون الرقم مالتي انتم تعرفونه
لان اكثر واحد مخابركم اني واكثر واحد تريدون تقشمرون عليه بالرسائل هو اني
بس والعباس ابو فاضل مااشترك وياكم بخدمة الرسائل لو تطلع براسكم نخله
وبعد سوولي اغراء برسائلكم الحلوه مال مريدي ولكم علينه
ومااريد ولا دينار منكم الله لا يعوزني عليكم حتا التجأ الى رسائلكم التعبانه واخلص فليساتي




الصبح والظهر والعصر والمغرب وبالليل ادزون رسائل ما خلصت رسائلكم


يابه مو كافي تقفيص واستحو على نفسكم


ما شبعتوا لغف وكرف


ومااوصيكم بعد اريكم تزغرون الكارت اريد الكارت اشوفه بالمجهر كوه



واريدكم تشتلون الي يخابركم اكثر من ساعتين لو مخابر رئيس امريكا هم احجي وياهه بخمس دقائق خل شويه انطير فياله :2:
وتدرون شنو الاغنية على الانتظار فوكاهه الاغنية تشلع الكلب وتقهر
وتخليك تحس يضحكون عليك



:3::3::3::3::3:فوك النخل :3::3::3::3::3:


يعني الجماعه شاتلينه فوك النخل






الله يهديكم يا شركة لا زين العراقية


وكل دينار اخذتوه بالبوكه والنصب ان شاء الله رب العالمين ما يضيع حق الفقراء والناس المتورطين وياكم لكن شجابرك على المر غير الامر منه





هذا الموضوع بقلم اخوكم الزير سالم لان روحي طالعه من شركة لا زين وبوكه وجذبه وخمطه وتقفيصه شركة لا زين ام الرسائل
والكارتات الصغار
تكشط الكارت يروح الكارت والرصيد وابوك الله يرحمه


شلون نعمه هاي على العراقيين


وهسه يوزعون خطوط بلاش تعالوا بس اخذوا


تعرفون ليش يوزعون خطوط مجانيه


حتا يكثر الخمط


وعدهم :3:
100000000000000000000000000
مااعرف شكد الرقم


بس هذا الرقم كله رسائل يريدون يوزعونه على المشتركين


يخافون تبقى على كلوبهم وتحمظ


تحياتي وتقديري


الزير سالم

وعشت والله خويه وصح لسانك
وانا لله وانا اليه راجعون هيه ظلت بس على هاي الشركة موالعراق كله ادمر من وره هيج نماذج
ربي يوفقك لجميل طرحك المميز
دمت بالف خير

تحياتي لك

هههههههههههههههه
امبين عليك ياخوية مشلوع قلبك
اللة يساعدك
وكلامك كلة صدك
لان زين خبصتنا برسائلها
حتة الساعة 3 الفجر هم ايدزون رسائل
تحياتي لاخوي الغالي
واللة يخلصك من رسائل الشبكة

ولله كلامك منطقي
اني من ناحيتي من توصلي رساله من الشركة بدون تفاهم حذف على طول
ادري بيه كلام كذب بكذب
ورحمة الله على الخطوط الارضية جانت ارحم واستر
تحياتي لك اخي الزير على ماسطرت اناملك من موضوع
تحياتي وتقديري

انا الحمد لله خلصت منها نهائي
لان كان عندي خط
اثير صار له حوالي 5 سنوات متوقف والحمد لله ما فعلته
وانة مرتاح هسة وية شبكة اسيا سيل خدمة زينة نوعا ما وعلى فكرة الرسائل اللي ذكرتهة كلها لطيفة
بس عجبتني هذه
تريد 1000 لتر بنازين اتصل على الرقم 1119 وراح توصلك ال 1000 لتر برسالة مع قوطيه دهن فوكس
وهاي تفيدني حتى استقاد من البنزين والدهن لسيارتي البطة
اضرب
شكرا لك اخي الزير على الموضوع الجميل
لك تحياتي

تريد ينهجم بيتك وبيت الخلفوك اشترك ويانه بخدمة زين سمعني واسمع ياس خضر وهو يغني جذاب دولبني الوكت اتصل على الرقم 6456


ههههههههههههههههههههههه
والله حلوة منك يازير
تسلم اخي العزيز على الموضوع والابداع
تحياتي لك

والله يا اخي الغالي اني مرتاحة لازين ولا اثير سابقا
همزين خطي اسيا سيل صار 4 سنوات والحمد لله
والله وكت يوزعون الخطوط مجانا واني اذكر اشتريت اول خط كان اثير كبل 6سنوات بــ 100 دولار
الله يرحم
وحلوة منك يازير سالم وياربي نخلص من شبكات ال لا زين
تحياتي والله يعينك اخويا نصيحة من اختك الازغيرة اشتري خط اسيا سيل واخلص من هاي الرسايل ودوخة الراس

والله يا اخي الغالي اني مرتاحة لازين ولا اثير سابقا

همزين خطي اسيا سيل صار 4 سنوات والحمد لله
والله وكت يوزعون الخطوط مجانا واني اذكر اشتريت اول خط كان اثير كبل 6سنوات بــ 100 دولار
الله يرحم
وحلوة منك يازير سالم وياربي نخلص من شبكات ال لا زين

تحياتي والله يعينك اخويا نصيحة من اختك الازغيرة اشتري خط اسيا سيل واخلص من هاي الرسايل ودوخة الراس


الف شكر للمرور عزيزتي طيبة النجف

يااختي اصلا اني ماعندي خط اثير

والله عندي عراقنا

ماادري بالعراقنا راح يلزكونه ويه هاي الاثير البلوه

تحياتي وتقديري

الف شكر اخي العزيز الزير سالم المحترم
اخي انت ما منتبه شيء مخفي عليك يمكن
هيه الشريكه اسمها (زين ) ما معنى زين اخويه الغالي
كلشي يأخذ منك زين
بس اتعبي رصيد يروح في خبر كان زين
والرسائل عليك مثل المطر زين
يا خويه مو هو امبين من اسم الشريكه زين يعني كلشي الي يصير زين الهم مو الك اذا الك مو زين
برد اعصابك وخليك كلش زين
تحياتي وتقديري

تريد 1000 لتر بنازين اتصل على الرقم 1119 وراح توصلك ال 1000 لتر برسالة مع قوطيه دهن فوكس


ههههههههههههههههههههه


بعد شتردون كل هذي الاغراءات والعطيات وتوصيل للبيت وماتطلع زين


الله المستعان


هيه ظلت على شركة زين عزيزي ليش هيه غير عن الباقين ؟؟

مو المثل يكول
مو اذا طاح الجمل كثرت سجاجينه
وهذي وحده من السجاجين المسلطة على رقاب الشعب المظلوم


تحياتي لك

مع تحياتي
اذا
الشغلة بقت على الرسائل مال خط زين
هينه اعيوني
ابو ليلى
تدري الان اكو مصيبة جديدة على العراقين
الي بالخراج
اذا جوازك انتهت مدة صلاحيته
السفارة ما راح اتجدد الك الجواز
لان التعليمات بعد ما وصلت للسفارات العراقية في الخارج
تقبل تحياتي
:66 (46)::66 (46)::66 (46)::66 (46):

تسلم الايادي اخي الزير سالم
نعم هذه الشركات الاستثمارية دمرت العالم

ههههههههههههههههههههه
معقوله
اني اشوف الاعلانات بالتلفزيون
اكول انيالهم الي بالعراق اتصالاتهم بلاش هههههههه
لا تكول انتي الي كريتي علينى

لالالا خلص بعد ماكول

لان منشلع قلبكم مبين من الموضوع
ارجع اشترك
بعد محد يحسدكم ههههههههههه

تحياتي

مشكور اخي الزير على هذا الموضوع الجميل وبما انه فتحت
باب نار جهنم على زركة السلب والنهب لازين ولابعدين
ولا نبيع كارت بالدين
اهديك ابيات من الشعر على الخماطه بالشركات الوهميه
البقاله موالنقاله



اريد اخابر والصوت يكطع .......ومن القهر موبايلي بالكاع اصفكه
بس اعرف الدبان واعرف الطركة.....وذا يبقه الخمط جد جدكم انحركه



...........
عذرا للمداخله لكن مقهور حيل ولغيت الموبايل من وره لازين
تحياتي

ههههههههههههه

مشكور عيوني دومك متآلق

ننتضر جديدك

الف شكر لكم جميعاً دمتم بخير

والله شي مؤسف جدا

شكرا لكم جميعا لتفاعلكم مع الموضوع
دمتم بخير

عندي اربع شرايح اربعتهن اسيا
ههههههههههههههه

الله يكون بعونك اخي العزيز بس ما باليد حيله ومثل ما گلت شجابرك على المر غير الامر منه يعني بين قوسين مجبورين وهذا الخط اذا تغيره لازم تنطيه لاكثر من 200أو 300 شخص مسجل بموبايلك والخط اللي تاخذه منو يگول مو نفس البوگ مشكور على الطرح الاكثر من رائع تقبل مروري

ههههههههههههههههههه
موضوع جميل
و الاجمل ألطريقة الكتبت بيها الموضوع
الله يكون فى العون
تحياتى
:66 (46)::66 (46):

شكرا للعبقري حياكالله وحفظك
http://n7bkm.net/upfiles/KIE70310.jpg

شكراً لك اخي الغالي
على الموضوع الجميل

صح لسانك اخويه العزيز
شركه زين ماخلت على حالنه حال
كله نصب ونهب ارصده
والله انت الله يساعدك اذا تخلي رصيد اليوم
باجر تلكا طاير رايح للشركه
تحياتي لك