صبر ايوب .. رساله الى مسؤول



عراقيتك شرف وعكال فوك الراس
منو الغيرك رضه التنذل عراقيته


العراق اول وطن بالغربه عينه اعليك
وانت اول شخص للسوم سويته


العراق العافلك هيبه اعلى كل الناس
دليني بحياتك بيش جازيته


خلاك بنعيم ومن تعلت بيك
تعنيت الحرامي وجيت دليته


انت اللي إكتبت بيدك وطن للبيع
جبت الاجنبي ودلال خليته


وانت الجمعت كل معشر العدوان
وانت اللطخت بالذله جاكيته


بين معدنك من صار عندك جاه
ونزالت رحمتك من تدنيته


نزفنه اعلى العراق انهار يابو انهار
ضيعته برجعتك ريت ما جيته


حتى بغربتك جان الوطن ينطيك
من طاح الوطن بالضيج شنطيته


ما ظلك عذر خلصنه ماكو اعذار
شيفيد العذر للباع جنسيته


تضحك عالشعب كل يوم راح انطيك
شعبك مو طفل تغريه بجكليته


نمشي اعلى النفط والناس تصرخ جوع
دليني بظميرك وين وديته


مو جان العراق الناس تحلف بيه
وماجاع الفقير بجال صينيته


بس لمن لفيت اعلى العراق اندار
وضعه وسرت العدوان وضعيته


فلوس تفرهدت واسمه النفط مبيوك
واليحجي الصحيح ارهابي سميته


كافي من الظلم ما عندي صبر ايوب
صبري وي العزيز المات زتيته


كل ساعه بحلم يطلع حلم جذاب
وكل ساعه انصدم بالزين ظنيته


ساعه وانفجر وامطر سموم وغيض
ورماد الظلمني يصير تاليته


انا ابن الما توانه بثورة العشرين
وانت ابن السلامه يشيل طاكيته


بقلمي
محمد عبود العبودي

صح السانك يا حبيبي .. يا ابو جاسم ...

هلله هلله ..انت مبدع ..

ولكن

منين اجيب احساس للي ما يحس

تقبل مروري ودمت لنا مبدعآ

صح لسانك اخ العبودي
ومبدع كالعاده واسال الله ان يحفظ العراق واهله

تسلملي حبيبي استاذ محمد على هذه المعزوفة الرائعة....تقبل تحياتي صديقي الغالي.