السلام عليكم




احبك من زغر سنك ويهلك
ليش اليحب يتعذب ويهلك
اغار عليك من تكعد ويهلك
اذا وية الغريب شلون بيه



ياشهم بوكفتك وياي ينشاد
اخوي كلبي دوم عليك ينشاد
ظهري لاتظن بغريب ينشاد
اليشدة شماخك تلفة علية



حياتي عكب شخصك شلي بيها
وجميع اعضاي صارت شلل بيها
توديلي رسايل شلي بيها
اريدن شوفتك والكعدة سوية


انا صياد وصادتني شبكتك
حالم بيك جن بستك وشبكتك
ادك عليك ليش مشغولة شبكتك
انه الممنون اذا ترمش علية


مشيت وشوكم عتني وردني
مسحت الدمع بجفوني وردني
اذا مكتوب من عدكم وردني
مثل ميت ترد الروح بيه



الك بس انت كلبي ورچيتة
ودمع العين يمك ورچيتة
ابتعد كلمن نخيته والرچيتة
ولا واحد اجاني ومر علية

راعيتك ليش كلبك مارعاني
ويهمك فد دليلي ومارعاني
مرة احبس بدمعي ومرة اعاني
ومرة تطيح عيني بين ايديه


عليمن تنفش بريشك وينحاك
تكول الماي اغزلنة وينحاك
يمكن جسمك تلوحة وينحك
اذا كلبي كرصني شلون بية

كل مصباح روحي بسهم تنصاب
وعكب عزهه عليه انذال تنصاب
علي حيث المصايب لون تنصاب
ترى ألأيام صارت ليل هيه



ان شاء الله تعجبكم

تحياتي للجميع

منقول

عليمن تنفش بريشك وينحاك
تكول الماي اغزلنة وينحاك
يمكن جسمك تلوحة وينحك
اذا كلبي كرصني شلون بية
هاي الابوذية عجبتني حيل
عاشت ايدك يالغالي لاحرمنا من ابداعاتك
تحياتي اخوك المشجع**

شكرا لك اخي العزيز على مرورك العطر
تقبل تحياتي

مشيت وشوكم عتني وردني
مسحت الدمع بجفوني وردني
اذا مكتوب من عدكم وردني
مثل ميت ترد الروح بيه


اخي العزيز ابو ليلى
باقه جميله من الأبوذيات
شكرا على هذه الذائقه الرائعه
خالص تحياتي

مشيت وشوكم عتني وردني
مسحت الدمع بجفوني وردني
اذا مكتوب من عدكم وردني
مثل ميت ترد الروح بيه



تسلم ايدك
ويسلم لنا هذا التذوق
ابوذيــات كلها احساس
ماننحرم يالعزيز
الف شكر لك وللجهد الطيب
اطيب تحياتي لك