بعد ماتوصل الاخبار -*- سمعنه سافر الكرار
كصدنه اليوم والينه -*- وحيدر طول علينه
سمعنه سافر الكرار
-*-
سفرتك طالت وتدري الكلب مجمور -*-وايتام عله بابك تنتظر وتزور
شما اوصف سفرتك والزمان ايدور -*- مثل مادار دهرك يالطبع ناعور
ماندري الجره والصار -*- بغيابك والزمن غدار
بجفوفك من تربينه -*- وحيدر طول علينه
سمعنه سافر الكرار
-*-




عكب عينك ياحيدر ضلت ايتامه -*- وعكب فكدك سرى الطغيان باحكامه
علي الطاح بمصابه وطبرته الهامه -*-المجد زاحف تعنه ويطلب حسامه
بتراتيل الفجر تذكار -*- يارواي اليتامه وجار
كبل موتك تمنينه -*- وحيدر طول علينه
سمعنه سافر الكرار
-*-
كصدنه ايتام ننشد والجرح مالوم -*- انفجعنه بالخبر نوكع نرد انكوم
من طبر الصميده والاثر معلوم -*- بتدبير المرادي بسيفه هالمسموم
من سيف الغدر لودار -*- ابن ملجم تلاشه اوذار
خليه الدار ردينه -*- وحيدر طول علينه
سمعنه سافر الكرار
-*-
تعنه الموت يكصد يم علينا الغاب -*- هضيمه وموحشه ديارك ياداحي الباب
لفت زينب تشابح تشرح الاسباب -*- مهضومه بفجيعة طبرة المحراب
ياجرح الترك اثار -*- من دار وصفينه بدار
يابويه عتاب واسينه -*- وحيدر طول علينه
سمعنه سافر الكرار
-*-
عتابي وياك محراب المنيه انخاك -*- انه زينب لفيتك يالجنت بحماك
تركت ايتام تنحب والكلب ناداك -*- يافقار الرسول اكصد يتامه هناك
اكصد والدمع مدرار -*- ومتوهجه بدليلي النار
عله دروبك تعنينه -*- وحيدر طول علينه
سمعنه سافر الكرار
-*-
علي الفاز بطبرته الكعبه تبراله -*- مثل روج النهر لجروفه مياله
يظل طبع النهر لوشحت دلاله -*- علي الساجب دليله وحسرة اعياله
من دمك جرت انهار -*- لو دم اليتامه اندار
جفيل وطول سنينه -*- وحيدر طول علينه
سمعنه سافر الكرار
-*-
وصيته للحسن بويه تدفنوني -*- بخفيه وليل ظلمه من تودوني
مثل تشييع زهره الليله شيعوني -*- ومثل دفن الزجيه بهيده خلوني
وبدفن الشهيده اسرار -*- وبنعشج نبت بسمار
رجعنه اكبور خلينه -*- وحيدر طول علينه
سمعنه سافر الكرار
-------*********-----------**********----






*نصاري* مهداة الى احباب اهل البيت*ع*



علي القالع حصن خيبر تعرفونه -*-الصرح ذاك المجد عنوانه تلكونه



-*-


منين ابدي ياحيدرواكتب الاسباب -*- القلم طاح بطبرتك بطيحة المحراب


يامحراب المنيه انهض تراني مصاب-*- نهض صاح القلم حيدر يسمونه


-*-


يسمونه المجد لوصارع الكلفات-*- علي الفاتح حروب وكاشف الغبرات


علي القرأن ناطق توصف الايات-*- علي النور التجلى شما يبغضونه


-*-
شما اكتب فرح تتزايد احزاني -*- لآن طبع الحزن بالزهره وجداني
ارد اردود واكتب للحزن ثاني -*- باحزان الصميده الزهره بعيونه
-*-
بعيونه التشابح للنعش لوسار -*- من فكد الزجيه بطعنة البسمار
ماضلت نواظر بالسفر تذكار -*- من راح النعش حيدر يشيعونه
-*-
يشيعونه بنينه وصحبته بحركه -*- من نوح اليتامه ألزيد الفركه
وامتون العقيله الليله محتركه -*- ياحمال النعش ريض يودعونه
-*-
يودعونه بدمع لوسارن اضعوني-*- انه زينب كصدتك لا تتركوني
من كثر البواجي راحن اعيوني -*- ياجمر المصيبه من تدفنونه
-*-
تدفنونه اندفن جدمي كبل دهري -*- يادفان الفجيعه شتت فكري


الكبر محفور كبلك واللحد يبري-*- ياوادي الغري امعلمه اضعونه
خادمكم
الكعبي

سلام الله على داحي باب خيبر علي عليه السلام

عطر الله انفاسك شاعرنا الكبير
ودام لنا هذا الفيض المبارك والروح المواليه
ولاحرمنا روعة هذا المداد المتوشح بحب اهل البيت
جعلهم الله شفعاءك يوم الورود

تقبل اطيب تحياتي

سلام الله على داحي باب خيبر علي عليه السلام

عطر الله انفاسك شاعرنا الكبير
ودام لنا هذا الفيض المبارك والروح المواليه
ولاحرمنا روعة هذا المداد المتوشح بحب اهل البيت
جعلهم الله شفعاءك يوم الورود

تقبل اطيب تحياتي

شكرا على مرورك الرائع اختي ام فيصل واشكر ترشيحي لنيل الوسام وهذه شهاده اعتز بها تحياتي الى المسؤولون الذين منحوني هذا الوسام وانشالله هذا حافز الى العضو او المتسابق حتى يعطي ويبدع اكثر تحياتي مره اخرى خادمكم الكعبي

سلام الله عليك ياولي الله وامير المؤمنين وقائد الغر المحجلين علي عليه سلام الله
بوركت يمينك وطيب الله انفاسك
وجعلك من الموالين المخلصين لمحمد وآل بيته الطيبين الطاهرين
سلمت اناملك وزادك الله شرفا بخدمت محمد وآل بيته
خالص تحياتي

اشكر مرورك الكريم اخي السومري