جنت غلطان ما خذ غيبتك دوم
تحلفلي واجذبك وانهي العتاب


وتجي وتوكف وباب الروح مسدود
وﭽنت لغير حبك فاتح الباب


ادور فرصة حتة ازاعل وياك
وعلى كل كلمة اسوي حساب وكتاب


وارد زعلان منك ما اعرف ليش
واتركك من اروح ادور اسباب


اعوفك وادري روحك تمشي وياي
واخليك بگفاي دموع وثياب


واگلك محترك بس انة بردان
وتجي اطفيني واشتم بيك عطاب


يلگلبك وياي كتاب مفتوح
لكن وية غيري يصير سرداب


يلمرهمها بس مارهمت وياي
يل ماخذ بطولة بدور الاحباب


كلما باب تفتح حتة اراضيك
تلگاني بغيابك سادلك باب


تتناكث احلامك خوف وياي
مثل رجفت العش گبال حطاب


انا هديت ﭽفك وردة وتطيح
وعلى خدودك الدمعة مهاجرة اسراب


يل منك دريت شلون مرات
اكو بين الدموع ادموع تنهاب


ياخيبة امل فلاح بعدين
درة بوكت الحصاد الذارة تراب


قلب شايل ﭽفن رديتلك هيج
اخذ ثارك لان بيناتنة احساب


ولتسامح بعد للة في اللة
ولا تلزم الﭽف البي الظن خاب


وانا مزعلك بكد ما مفتر الميل
وكت بي ﭽنت تحسب طول الغياب


اهي جانت غلطتي وفرطت بيك
وطن عفتك ورحت الديرة اغراب


اذا رايد تعرف شلون ندمان
شوف دموعي اذا طاريك ينجاب


اذا تذكر وعدتك مرة بالليل
عهد گتلك نظل لموتنا احباب


متت هسة ولكن نفسي موجود
وتتنفسك روحي وية الهوة الهاب


وهسة الدور الية واني اوصيك
اذاجرحك تلايم وانتهة وطاب


تجي تهل ذكريتك عل الگبر كون
لتخليهم ايهلوني تراب


وبعد من ثلج بالك تصنع احلام
لان حلم الصنعتة من الثلج ذاب


واذا حبيت بالك تعرف الناس
المرة الثانية يگولون ﭽذاب

بقلم الشاعر المبدع
ايهاب المالكي

تسلملي خيي عمار ع الذوق في النقل الجميل...تحياتي الك ياوردة.

سلمت يداك الغزي \\\\\\
تحياتي اليك والى الشاعر\ابو حيدر ايهاب المالكي

تحية احترام وتقدير
للشاعر ايهاب المالكي
وتحية اعجاب لذوقك عمار الغزي
تختار ماهو جميل
وفقك الله
دعائي لكم بالخير
والسلامه

انا هديت ﭽفك وردة وتطيح
وعلى خدودك الدمعة مهاجرة اسراب


اختيااار ررائع جداا اخ عمار وصح لسانه الشاعر القدير
مع خالص ودي واحترامي

انتم الاروع والاجمل احبتي
شرفني وانار صفحتي مرورك الغالي
لا حرمني الله جميل ردودكم
لكم مني خالص الود