:66 (46):
اِشلون أوصفك
حسين جهيد الحافظ
اِتريد أوصفك اِشلون أوصفك
وآنه أدري الليل فرحه
غافي اِبوسط الشعر
اِحواجبك والعين تسيورة سمر
والگمر آخ الگمر
اِشگد وكح .. .. واِشگد صلف
من ضوه الوجنات
بايگ لونه حيال الگمر
ومنزراگ العين أخذ لونه السمه
شوگ وعبر
للمطر
والغيم .. واِلماي النهر
خيزرانه الطول واِعيونك بحر
تيّه السفّان والصاري اِنكسر
ضحكتك أجمل قصيده
وبسمتك همسة وتر
رگصة الچوبي مشيتك
ونگلة اِجدامك أغاني بيهن الشارع سكر
رسمت النجمه خطوتك
والهوه اِبسحرك خدر
اِنته .. .. اِنته المبتدأ
وكل شي من بعدك خبر
اِشلون أوصف العين
لو قوس الحواجب
لو سماء الخد لو فيّ النحر
جرة أنفاسك .. عطر قدّاح
والصفنه خيال
اِو دورة المحبس خذت شكل الثغر
الهوه اِنته
اِو منك اِعذيبي الهوه
الضوه اِنته
اِو حيا من طبعك
أخذ طبعه الضوه
اِجروحي اِنته
واِنته لجروحي دوه
عشرتك مس من جنون
ذبني اِبچالي هيامك
اِبهيد بويه اِبهيد
من تنگل اِجدامك
روحي سباحه اِعله خضرك
اِو گلبي شكالة اِحزامك
حطني شتريد اِعله صدرك
وخلني أغفه...
أغفه هنيالي اِعله شمامك
يا شمّام عمري
عمري والعباس منذور اِلغرامك
آنه بيدك
كلّي بيدك
بويه بس وضح مرامك
اِتريد أموتن ؟
هاك اِخذ سچينه صبري
فدوه واِذبحني اِعله اِيدك
كلّي ملكك وأعنذر لك
اِگعد اِو حضر عمامك
اِتريد ثار..
روحي ثارك
هاك وذرني اِعله كيفك
فدوه للسچين ما حاجه
– اِو حياتك –
آنه مذبوح اِبكلامك
آننننننه مذبوووووح
اِبكلاممممممككككك

حيا الله بو علي
في ربوع الفرات
ومرحبا بك بيننا عزيزي
بداية مميزة
وقصيدة غزل منثورة باحساس جميل
سلمت يداك على هذه الكلمات التي نثرت بكل جمال وروعة
مع اطيب تحياتي لك

حلو ابو حسين سلمت اناملك
وانتبه لما ابداه لك الشاعر حسام
تحياتي لك

الفاضلة أم فيصل تحياتي
مروركم أشرني متمنياً لكم ولمنتديات الفرات
التقدم
الناصرية / عراق
حسين جهيد الحافظ

الأخ حسين جهيد الحافظ
اسمح لي أولا أن أرحب بيك
في منتدى الفرات
يشرفنا ان تون فرد من أفراد أسرة الفرات
بداية رائعة تدعو للتفائل
قرأت قصيدتك بكثير من التمعن
خيزرانه الطول واِعيونك بحر
تيّه السفّان والصاري اِنكسر
ضحكتك أجمل قصيده
وبسمتك همسة وتر
رگصة الچوبي مشيتك
ونگلة اِجدامك أغاني بيهن الشارع سكر
أستمتعت بقراءتها
بأنتظار المزيد
تحياتي لك