نذرنالك



أيام البعد جبناها صفنات
بين آمالنه وحيرت أمرنه
تجي لو ما تجي كضينه ألايام
وصرنه وياهو يدري... شلون صرنه ..؟؟
صبرنه متاع صار وبعدك بعيد
وتجوع أيامنه وتاكل صبرنه
شبعد يالماتمر مو كافي الغياب
وصار هواي ننتظرك تمرنه
ونذرنالك تجي وندعيلك نعود
وعمت سجينه وشيب نذرنه
وعلى غيرك جذب ماترهم الروح
ومنو غيرك يسد حاجة نظرنه
يبن الناس غيرك ماكو موضوع
وهلبت بالجذب شخصك ذكرنه
نسولف بيك لأخر لحظه بالليل
وترد من الصبح تشغل فكرنه
ما عنت عليك بساعة غروب
روحك وأشتهت تسمع خبرنه
ياروح الكلب ياعزة الروح
يادمعاتنه وهمنه وسهرنه
يا أول عهد يا تالي الأيام
يلعب اصبانه يا شيبة كبرنه
أشكد كبلك مشو ما سلو الروح
ولا بغيابهم كسرو ظهرنه
البعد نيران كبره أيبخر دموع
وبس يزود يتبخر بصرنه
منين انجيب مثلك حتى ننساك
ومنو المثلك يعوضك لو خسرنه
الشبه كل أربعين حجايه تنكال
واذا واحد يصح جان أنتظرنه
تعال الجرح جن ومارضه يهيد
وحجينه وياه ما ينفع عذرنه
يشك روحه أعله طوله وينكت جروح
وكضينه خيوطنه وملت أبرنه
شوكت يندك علينه ويضحك الباب
ويترس بيتنه وصوتك يسرنه
وترد أنته ويجن الراحن وياك
وتجيبه وياك يالماخذ عمرنه




المبدع جبار رشيد




تحيــ الطائي ــاتي

انتقاء رائع اخي عمار
سلمت يمينك
نتمنى لك دوم التواصل والتالق
تحياتي
اخوك الامير