(( لا تــــكـــلـــــي ارجـــــــــــــــــــــــع )) ثمثمة جروح على جروف سواحلها

[علي عباس العبادي]

ثمثمة جروحي على جروف سواحلها

لا تكلي ارجع بعد لو ردت اروح ** الماي مايرجع عكس مجرى النهر
وانه نبعي الفاض غرك مشتهاي ** وروحي شبعت موت وانتخمت قهر
كـد نشوتـك بيه مستشري العذاب ** وكد نعاس عيونك اعياني السهر
عمر ومتانيك نسمه وشح هواك ** بوكت جانت ساعته تعادل دهر
ما اجيت وروحي مختنكَه برجاك ** ومن كثر شهكَاتي احس ضلعي انصهر
هلال حسبتك تهل ومتاني عيد ** ومن وصلي العيد ضميت الشهر
من كثر شوغاته وصراخ الجروح ** شلته كلبي اليحن بدلته بحجر
لجن وي اول سهم منك لفاه ** ماحمل سهمك شفت كلبي انفطر
صح الك ضلن حجي وشوك او وعود ** وهم الك ذكرى ودمع بيه شكثر
لاكن الماضل بعد انه المشيت ** وما ارد لو في يميني تحط كَمر
مو غرور تضن اعوفك انه لا ** لاكن الخافي اتضح
والحق ضهر
لاتكلي من الندم عضيت اديك ** ابهامك اتبره ونده بوجهك كفر
جنت اضن فردوس حسبالي انته هيج ** ماشفت فردوس بس شفتك سَقر
بالله شنسالك جرح طعنه وتهون ** وانته غدرك فاق ادراك البشر
سيفك البايج تحده بجرحي ليش؟ ** وصار دلالي لرماحك مستقر
كراب لسيوفك صرت مغروسه دوم ** والغمد كلبي صِده وخرلك وذر
سهامك تطوف وتصلي اعله الجروح ** بمرقد جروحي السهم مايغتفر
ماتت الضحكه على فراش السنون ** وخضّر الموت بثناياي وكبر
صح الك بصمات ضلن بالجفوف ** بس مخالب شفت الك طبعن اثر
وانه اكلب بالصور شفتك وراي ** نيابك مكشره شفتهن بالصور
لاتضن شوكي يردني وليك اعود ** هاي تجرالك اذا نده الصخر
الكاع تحتاج المطر يسكيها ماي ** وانه غيمه وطلكت زخ المطر
خل اروح وخلني ساكن خاف اثور ** ومن اثور اعصار ينذر بالخطر
وانته عود بهيمه ساكن ماتعيش ** تنقلع بأول هبوبي مـن الـجذر
انه محراب وصليب وانته سيف ** نشوف ياهو اليغلب وياهو الخسر

[حيدر اللامي]

كلمات بغاية الروعة
مشكور اخوي
العزيز
ننتظر الجديد
تحياتي

[الشاعر سلام الشويلي]

الى الأخ العزيز علي عباس العبادي قرأة قصيتدك فأحسست بصدق المشاعر وأنتقاء المفردة وخصوبة الشاعريه تجعل القارئ المتذوق يسرح بين مسافات المعاني المعبره لك مني ألف تحيه وتقدير .....زدنا من فيض مشاعرك .....وشكرا

انت غني عن التعريف فأنتم من اعلام الناصريه وشعرائها تقبل تحياتي

[عتابي]

عاشت معي كل كلمة قرأتها .. بصدق احساس ..
تسلم يا ورد