تفاحة الهريد والخوارده .
فد يوم الملك شارون الهريد هو ووزيره فجعر الخوارده يتمشون على نهر المسيسيبي احد فروع دلتا بغ داد .. شافوا بستان يخبل ... دخلوا للبستان ... شافوا شجرة عاليه كلش ...
معلكه بالشجره تفاحه رهيبه ...
اشكبرهــــــــــــــــــــــــــــــــــــــــــــ ـــــــــــــــــــــااااااااااااااا . !
تدرون الهريد نفسه دنيه .. كال للخواره : لك شلون احصل على هاي التفاحه . ؟
كال الوزير : بسيطه يامولاي ... نأجر كرين من النهضه وعامل نصعده عالجب مال الكرين ويجيب التفاحه . !
كال الهريد : لا .. لك لا ... هذا شكد ياخذ ابو الكرين ..؟ لا شوفلنا غير شغلة الايجار .
لأن تخصيصات ماليه ماكو .
الخوارده : زين مولاي .. اتصل بالدفاع المدني حتى يجيبون سياره انقاذ ام الدرج ونصعد نجيب التفاحه .
الهريد : خوش فكره .. بس تدري رصيدي خلصان ... خابر انته وبعدين من اعبي رصيد عود احولك دولار .
الخوارده : والله يامولاي ... نسيت الموبايل مالي عالميز يم الستلايت . اعذرني ماشايل موبايل .
نظر اليه الهريد نظرة استفزاز وحقد ملعونه ( فخاف الخوارده من هذه النظره وحسبلها الف حساب ) .
قال الهريد للخوارده : ولك ملعون شلك بهاي السالفه التعبانه . مو انت شهرياً تعبي كارتين ابو التلاثين من بيت المال وين توديهن .
الخوارده : والله يامولاي يخلصن على قضاء مصالح البلد ... وكلها اتصالات ويا رئيس العسس .. وقادة الجيوش .. وخانات التصنيع العسكري ... تتصور يامولاي لو مو آني الحك عالموقف شجان صار ..؟
الهريد : ولك شصار ؟.. احجيلي ولا تظم عليَ
الخوارده : قبل اسبوع جماعة التصنيع لكيتهم شادين محرك مطي عالخيل . ! ومسوين الدروع من بلاستك معاد ... والسيوف كلها فافون مال جدوره تعبانه ومزنجره ... لو ما الحك عليهم جان انلاصت يامولاي .
الهريد : اي عفيه عليك والله ... اني اعرف عليمن اعتمد ... لو ما انته وجم اثول آخر مثلك .. جان امور البلاد اتدهورت من زمان ...
الخوارده : مولاي نرجع للتفاحه مالتك .. راح ادنك واصعد انته على ظهري وجيبها ...
الهريد : خوش فكره .. يلا دنك قبل لا اصيح للضحاك ابن ابي عنيفصه واخلي ياخذ راسك المعفن .
انحنى الخوارده واعتلى ظهره الهريد .. لكن ما ناش التفاحه ...
هنا قال الخوارده : مولاي اني اطول منك .. دنك خل اصعد على ظهرك بلكي انوش التفاحه .
نظر الهريد بلؤم للخوارده وقال : لا يملعون الوالدين . شلون حسبتها واحرجتني .. امري لله راح ادنك واصعد ثم نظر للتفاحه وقال : اجيبج اجيبج لو توذنين .
لكن الخوارده لم يفلح بالوصول للتفاحه ... هنا حظر صاحب البستان الذي كان يراقب مايجري عن كثب وقال للهريد ووزيره الخوارده :
يامولاي تفضل في ضيافتي وسأجلب لك تفاح احلى واجمل واطيب واكبر من هذه التفاحه .
رحب الملك ووزيره بالفكره واستظافهم صاحب البستان وقدم لهم ما اعجبهم من جميع انواع الفاكهه وعندما ارادوا الانصراف طلب الملك من صاحب البستان ان يكتب على ورقه كل مايطلبه حتى يختمها له وتصبح نافذه بختم الملك ..
قدم صاحب البستان ورقته للملك .. فتعجب الملك مما طلب الفلاح .. حيث كان مكتوب فيها (( اني فلان ابن علان بشهاده الملك شارون الهريدي اعلن بأنه ليس لي علاقه بأي من آل فجعر الخوارده )). ختمها الملك وسأله عن سر ماكتب في الورقه ..
فقال صاحب البستان : ياسيدي لا أأمن على نفسي في مملكه يعتلي وزيرها ظهر مليكها . !
بعد ايام قتل الملك الهريد وزيره الخوارده ... وصارت حواسم على آل الخوارده . فلم يبقوا لهم على مكيف او ستلايت او بيك اب موديل 80 تعبانه ومبنجره تايراتها .. ثم قام الناس بالبحث عن كل خوارده في جميع البلاد واصبح القتل والحوسمه على الشبهه .. ولما وصل السره لصاحب البستان ... اظهر ورقته
التي يتبراً فيها من آل الخوارده ومن والاهم ... من البعثيين والشيوعيين والقوميين والصدريين والصرخيين واخوان المسلمين والقاعده والمليشيات ...
بذلك سلم صاحب البستان على نفسه وماله ولا زالت التفاحه معلكه عالشجره ...
مفهومه لو اعيد ....
طركاعه
27/5/2009
رد مع اقتباس