اليوم جبت لكم قصيدة لشاعر عراقي اسم القصيده (بعد ما ريد فيزة )

[اميرة الورد]

احبائي اعضاء منتدى الفرات اليوم جبت لكم قصيده لشاعر عراقي كتب هذي القصيده للعراقين الذين خارج الدولة ولبلدنا الحبيب بلد الرافدين
اسم القصيده

(بعد ما ريد فيزة )

بعد ما ريد فيزه ولا لجوء انـــــساني
عمت عين الاقامه الدنست صـــــيتي

واشكركل صديق وكل خوي وكل جار
قــــفل بابه ورفض يـــــقبل عراقيتي

خلف الله عليكم والوكــــــــــت دولاب
لا بد يوم يـــــــــــنزل بيكم ارضيتي

لان اول امس كل البشر خــــــــــدام
جانوا للـــــــــــــــعراق واكلوا ابيتي

جان الضيف عندي مكرم ومهــــيوب
فوگ الراس اشــــــيله وهاي تربيتي

ما داعي اسولف وانه ابو النــــهرين
ياهو الــما سمع اخــــــــــبار حنيتي

بعد بصــــــمات اديهم والطبع موجود
من جانوا جياع بوســط صيـــــنيتي

يـــــا دنــيه حرام ومــنكر ومــــكروه
اذا ابــــن الــــــعراق الــــيوم وطيتي

معـــقوله نسيتي اسم الـــعراق بساع
لــــــو مثل الــــبشر همّن تــــناسيتي

مــيفيد الحچي ولا تـــنفع الـچـلـمات
راجـع يـا وطـن لـترابــك الزيـــــتي

راجـــع يــا حـبـيبة گــلبي يــا بغداد
وادرى بكـــثر ما ونـــيت ونيـــتي

وادري لوحّدج عفناج صار سنين
وادرى من الحزن تابوت سويتي

جيب الاغتراب وحـــطه بالـــتابوت
يا غربه الـــــــــــعراق شكثر اذيتي

ما اعيــش ابّحر مالح طـــعم يا ناس
انه بسجن الـــــفرات وفقط حريتي

وترابي ذهـــب والگاع من ياقــوت
ومن ثوب الكرامه البسهه بيريتي

واذا گالوا لترجع والوضع مو زين
اگول اني الوضع والزين تاليــــتي

وميهمني بعد ليصير خلي يصير
طعم الموت اشرف من هجر بيتي

اموت بوسط خوتي ويا حلاة الموت
من اجمع اهلــــــنه واكتب وصيتي

وصيتي لو متت لتچفنوني چفان
لفوني بعلمنه وهاي امـــــــنيتي

واذا تردون اليه بهالگبر ارتاح

امانة الله دفنوا وياي جنسيتي
امانة الله دفنوا وياي جنسيتي

اني مااقول شي غير بس الله يحفظ بلدنا الحبيب بلد الخيرات بلد الرافدين الي هم دجلة والفرات ويرجع مثل قبل واحسن وانشالله كل العراقيين الي خارج الدوله يرجعون لبلادهم

اتمنى انه تنطوني رايكم بالقصيده

وتقبلوا تحياتي
أمــــــيرة العـــــــاشقين

[سارة القريشي]

الله يجازي جيرانا مع احترامي الهم بس لحنا بأشد الحاجة الهم وهم تخلو عنا بس صدكوني الله يمهل ولا يهمل واكيد الي ديصير بينا اختبار من رب العالمين انشالله الوضع يتحسن ونكسر عيون كل غيور وحاقد والله يجزيهم مثل ما جازونا القصيدة روعة ياخوية والله يحيك

[اميرة الورد]

شكرا لمروركي الجميل اختي واني بنت تحياتي لك

[همس الغروب]

قصيدة مؤثرة أختي

[اميرة الورد]

[ابو علي الصكر]

الله كريم اتهون000
يا حافر البير لاتغمك مساحيه خاف الزمن يندار وانته تكع بيه
0000000000000000000000000000000000000000000000
حل الدنيا دواره

[طارق حداد]

قصيدة روعة ولله وكلمات مؤ ثرة الله كريم شدة وتزول انشاء الله ويرجع العراق احسن من الاول

[فلــــــه]

قصيده في منتهى الابداع
عاشت ايدچ خيتو ع الطرح المميز
دمتي بحفض الرحمن
تحياتي لك .. فُلـــه