{انجوينه}
......
انجوينه
بنار ادينه....
ومادرينه
وبهواكم...
والله بيه أتقشمرينه
غشنه مبسمكم...
طلع ما بيه عسل
بس ضكَنه منه ....
أتسممينه
غشنه ظلكم..
ماحمانه من الشمس..
لمن غفينه
أحنه ظنينه غصنكم
نوعه من نوع الورد...
لمه أشترينه
أحنه ظنينه هواكم
ورد ما يذبل جبينه
أحنه ظنينه سججكم
ماتردنه...
ماتردنه لو أجينه
ياتعبنه
يا بجينه
نريد بس نعرف ذنبنه
هو بيكم ...
هو بينه
وك آخ
يالقصة هواكم
صارت أحجايه...
بحلك كل المدينه
وك آخ
يالطشرنه حبكم...
وضعنه..وندور علينه
وك آخ
يا منفى الكلوب
المارحم يوم بسجينه
طلع حبكم
بحر خالي...
مسور وما بيه سفينه
لا نوارس....
لا ملاليح...
أعله شاطيكم لكَينه
ورغم كل هذا...
أنتضرناكم تجون
ومرت ايام وليالي
والعمر خلص اسنينه
ولا أجيتوا..
ولا سالتوا...
وحنا ياما لداركم...
بالشوكَ اجينه
ورودكم ندريها تذبل
نجومكم ندريها تهفل
وبيها ما يوم أهتدينه
أنتوا... مابيكم سبب
العلّه بينه
دروبكم ندريها صبخه...
ورغم هذا...
أحنه مشينه
أنجوينه
أبنار ادينه
.....
كلمات ناصر
اسماعيل الموزاني