{ليلي أبطول سچه}
...................
ليلي أبطول سچه والرمش مشاي
أغمض عين مره وعين افز بيها
أعبر أهموم گلبي وهم ترد وياي
بهمومي أحترت.... لاوين اوديها
على صدري جبل گوه النفس مشاي
أرد بالروح گوه.... وگوه امشيها
بعد نگلت جدم واوصل لجرف الماي
ومن جرفك حبيبي الروح أرويها
العود بلا وتر ما يرهم وي الناي
بوتاره النغم.... والطاسه ما بيها
الشموع بلا ظلام يموت بيها الضاي
منظرك گمر... وشموعي اضويها
أنه الزارع ورد حته بطريج أعداي
من روح التسامح.... روحي بانيها
گلبي شما حمل من الهموم أهواي
انه بفرحة الملگه أهمومي أغطيها
أحط روحي ورد.... للرايح وللجاي
وضيوف التجي..... بعيوني أخليها
أسمي شما كبر..... ما يختلف معناي
من حروف البساطه ألروح أساميها
هذاك لينگلب كل ساعه يمشي براي
موصاحب طويله وياك يمشيها
ما أبيع بيساري الچلمه لبيمناي
أموت أعلى العهد بالچلمه ألطيها
مو بيدي المراجل چلبت بالحاي
شلون أمشي وتظل للغير أخليها
موزاني وتظل هيبة عمامي أوياي
أخو باشه المعالي أبيدي بانيها
أذا صار الفخر نجمه البشر بسماي
أنجوم العاليه..... جواي أخليها
عراقي انه بمعزه.... شيدة دنياي
على بيوت الفخر بيتي انه عاليها
...............
كلمات
ناصر اسماعيل الموزاني