{ ماذّل للسراب}
.....

ما ذل للسراب ....ومنه أطلب ماي
ولا أسال نهر يدفعلي الروجه
ولا أترجه الشمع بالليل يبعث ضاي
ولا أكلف النجم تضويلي أبروجه
أنا عزت النفس مثل النفّس ويّاي
صارتلي طبع بالروح ممزوجه
على شمس التواضع سجلت بصباي
رغم أدري بأسمها الروح مدروجه
عودت النفس ع الطول أمد أخطاي
راضي بحالتي بالضحكه والضوجه
الفقير الدنيته گضاها خبز وچاي
يظل عنده حلم ........ياكله فروجه
البلابل من تغني يموت صوت الناي
رغم صوت البلابل بالسجن ضوجه
رادوني أغني وما رضوا بغناي
غنيت وشفتها..... الناس مزعوجه
حچييّ ما عجبهم خالفتهم راي
مأرضه أبد ..........بحچاية العوجه
المعاشر شمس متريحه ذروة فاي
والمعاشر بحر...... متخوفه الموجه
الماشم الورد لا تحسبه شراي
ريته تختنگ ....لو فاحت أعروجه
الفراشه تنمرد من تنكمش بهداي
بخيوط الترافه.... الحلوه منسوجه
بمشيته أتمايل چنها روجة ماي
وكل حلوه اتمايل... تمشي غنوجه
.....
كلمات
ناصر اسماعيل الموزاني