{مغشوشين}
....
مغشوشين
مغشوشين
بيكم والله مغشوشين
ذاك الطين...
هو الطين..؟
ما بيه صورة هذا الطين
لاهرش مطلع ...
بيه ورده
ولاغصن مخضر
من عنده
ولاريحان...
ولا ريحان معطر نشتم
ولا نيسان...
ولا نيسان مطلع برعم
ميتّه أهروشه
مثل الناس المدفونين
.....
مغشوشين
مغشوشين
...
چنا أنظنكم
سهرة گمره
چنا أنظنكم
ضحكة سمره
ضحكة شكره
لابيكم ليلة گمريه
ولاضحكه بشفة حوريه
چنتو ويانه ...
هَم بَهم
مثل الشريان
ويَ الدم
أتبين.....
محلوبه الغيمات
وصبخه ......
الگاع بلا وردات
ماتحمل ....
صارلها اسنين
...
مغشوشين
مغشوشين
...
لافجر......
الشگ ثوبه وهدّ
ولانور...
ع الظلمه أمتدّ
چاوينكم
چنتوا أمس
چنتوا شمس
أشماله ضواكم
لابد بنص غيمه
وشماله هواكم
أتگبع بتَحريمه
چذابه مساجدكم
چذابه المحاريب
الحمل عدكم....
طلع ذيب...؟
ياما...نطرنا أغيومكم
وأغيومكم... چذابه
ياما ..نطرنا الليل..
يفتح بابه...
وتطلع شمس
ما بينوا أحبابه
ولا ردّ أمس
وأحنا بعدنا متانين
...
مغشوشين
مغشوشين
...
كلمات
ناصر اسماعيل الموزاني