كتبها ألنه القصيده ** للثوره المجيده
مله ابياتها دموع
كتبها فوك لضلوع
**********
شاعرها وصف اغله معانـــــي وخط
عله رماح وسيوف وخيم وعله الشط
نقًطها الحروف نقاط دمّــــــــــــه حط
حروف الذلّه ماشفناها بيهــــــــــا قط
قرتها نجوم وجبال
قرتها رياح ورمال
قراها ليل وطلوع ** كتبها فوك لضلوع
*********
خياله للحقيقه واســـــع الصوره
دخلت بالكلب ونخطّت أسطوره
خلّدها الزمــــان وبقت منصوره
آلامه حرم وايتام
وطفله بالسهم ينظام
وصورة طفلته لتلوع ** كتبها فوك لضلوع
************
رسم بيها جيوش اعليــه تتقدم
ورسم خيمات سمّا هن ألمخيّم
عطّه صورته لون السواد ودم
والله بنور عرشـــه اللوحته قيّم
قيّمها النبي بدمعــــــه
وبنته الزاجيه البضعه
وحيدر دمعته شموع ** كتبها فوك لضلوع
***********
حط فوك الرمال أجساد مطعونـــــــــه
أو وصف ليل المسافه السارت ضعونه
يصبّر دمعه ماينزل من عيونــــــــــــه
عله الراحو يساره وما يودعونــــــــــه
ابهاي اللوحه عانيها
الحقيقه بكل معانيها
تجي زوارها جموع ** كتبها فوك لضلوع
**************
الشاعر الكاتبها بكل معانيهـــــــــــا
عله رماح أنتصر دمّه ومواضيهـــا
قدّم روحه قربان المعاليهــــــــــــــا
فوك النجم راياته ترف بيهــــــــــــا
اسمها غاضريّه وطف
اسمها جود رايه وجف
اسمها أصحاب وخشوع ** كتبها فوك لضلوع