سجلوا لقطات رائعه ومدهشه من مشاهد حياتكم الخاصه

[قرة العين]

لدي فكره رائعه وجميله
ومضمون الفكره هي :

تدوين مشاهد مدهشه او مواقف او طرائف او حوادث
التي وقعت في مشوار حياتكم الخاصه وبحلوها وبمرها
مثلاً في فصل الدراسي او السفرات المدرسيه
او مع الاصدقاء او مع الاهل او اي شي اخر

فنريد ان تشاركوننا بها وان تذكرون لنا
ماذا حدث لكم منذ طفولتكم الى حد الان
لكي يكون لنا سجل حافل بذكريات الاعضاء ومن طاطا لسلام عليكم
وعبر شريط من مشاهد حياتكم الخاصه والتي لاتُنسى
مهما طال الزمان عليها

فــ نود ان نشارككم ونستمتع بافراحكم واحزانكم
وان شاء الله ماكو احزان
ان شاء الله انشوف تفاعل بالموضوع ومن الجميع

[قرة العين]

سأبدا انا
الموقع في العراق بغداد الجديده
الذكرى تخص مدرسة البحتري

كانت بداية افتتاح المدارس واني جنت بالصف الاول ابتدائي
وطبعاً جنت كلش فرحانه لان راح ابدي بالمدرسه
وفرحتي جانت اكثر بالكتب الجديده والاقلام ومساحات ابو الريحه الطيبه
والجنطه وصدرية المدرسه بلون النيلي مع القميص الابيض
وطبعاً قبل ماجنت ابدي بالمدرسه جنت مدخوه امي
(اشوكت تبدي المدارس)
لان جنت كلش اغار من اختي الي اكبر مني بسنتين
اشوفها شلون جانت اتحافظ على كتبها وقرطاسيتها وزيه المدرسي
واخيراً جاء يوم افتتاح المدارس واني مصدكت كَعدت
من الغبشه من الساعه خمسه الصبح
علمود ارتب حالي واجهز نفسي للمدرسه
فاختي الي اكبر مني والي اغار منها
كَامت من النوم طبعاً بسبب الهوسه الي مسويتها فوق راسها
وكَالت لي اذا على هالسالفه راح اتبهذل وياج ومراح اعرف انام
عمي على كيفج قابل المدرسه راح تنهزم منج علمود هاي تريدين اتلحكين عليها
ومهتميت بكلامها الى ان صارت الساعه 8 الصبح
واخذتني امي الى المدرسه وبدينا بالنشيد الوطني( وطن مدى )
وبعدها تحية العلم وبعدها اجني المعلمات وكل وحده صاحت طالباتها
الى ان اجه دوري مع معلمه مسيحيه اسمها ست عواطف
اذكرها جان شعرها اصفر وحاطه مكياج حلو ومرتبه نفسها وطويله
المهم داومت بحدود اسبوع وبعد اسبوع اجتي المعلمه علينا ومجانت حاطه مكياج
وشكلها عصبي وبشرتها جانت صفره مثل لون شعرها
واني جنت كَاعده الرحله الاولى من جهه الشباك ويه صديقتي المسيحيه
كان اسمها ياسمين ومعلمتي جانت دائماً تحط الكرسي مالتها يم رحلتنا
يعني وجها بوجهي, ووجها جان اينقط شر من عينها
بس الله يستر منها
وعلى غفله سمعت المعلمه اتصيح على وحده من طالبات الصف بعصبيه
لان الطالبه سوت اشويه وكاحه والطالبه كَامت ترجف اي حقها بعدها صغيره
واني هم خفت منها كَلت خلص من باجر بعد ماراح اجي للمدرسه
وبسبب معلمتي وبدون احد من اهلي يدرون
فكل يوم اطلع اني وامي من البيت الى المدرسه
بس مجنت ادخل المدرسه جنت اوكَف قريب
من المدرسه والعب واكل لفتي الى ان يدق جرص المدرسه
ويطلعون الطلاب للبيت ,واني هم ارجع للبيت وبقيت على هاي الحاله اسبوع كامل
ويافرحه ماتمت اجتي معاونة المدرسه ست قسمه البيتنا
ونفس الوقت هي اتصير صديقة امي واني ماعرف اصار بيه
وين اهرب من ايد امي اذا عرفت السالفه
فكالت اشو بتج متجي للمدرسه شنو ناوين اتبطلوها من المدرسه
امي اتفاجات من هذا الكلام لان كل يوم هي تحضر ريوكي وتوصلني لباب المدرسه
كَالت امي اني كل يوم اوصلها بيدي للمدرسه اشكاعده اتكولين كولي غيرها
والمعاونه كَالت لا والله معلمتها تطني تقرير عن بتج على
ان هي مداوم المدرسه من اسبوع كامل
وامي صارت مثل النار الكبره يعني لو اصير بيديها جانت اتموتني موت
فست قسمه كالت لامي كعدي احجي وياها بهدوء
وبدون عصبيه حتى تفهمين منها شنو السالفه
وان شاء اله باجر انشوفها بالمدرسه وامي كالتها ان شاء الله خير
واول مطلعت المعاونه من بيتنا قالت امي لاخواتي
روحوا جيبوها من جو الكاع هسه وبسرعه
وطبعاً اني جنت خاتله بالمبرده الثانيه العطلانه وحاطيها فوق السطح
وجنت ابجي من الخوف يواش واخواتي مخلو مكان ومدوروا عليه الى ان كشفتني
بزونة جيرانا ولونها ابيض وجانت كلش حلوه

وجان ملبسيها قلاده بيها مدالية جرص
فجانت هاي البزون كلش اتحبني دائماً تجي يمي ومرات اشوفها من الفجر نايمه يمي
المهم كامت اتصيح البزونه حتى افتحلها باب المبرده وتدخل يمي
واني جنت اكشها بس مجان اكو فايده وياها الى ان حسوا اخواتي عليه من صوت البزونه
وعرفوا مكاني واخذوني يم امي
وامي الله يذكرها بالخير مجانت تعرف يمه ارحميني كبل استلمتني طراك طريك
وبعدها اخذت مني الاعتراف الكامل والي كان سببها المعلمه الست عواطف
ومن بعدها صارت الي توبه ومعدتها ابد خوفاً من عقاب امي
والحمد لله ابوي مجان يعرف لو جان يعرف في وقتها جنت صرت في خبر كان
بس الحمد لله امي جانت اتحل امورنا بنفسها
بعيد عن ابي لان ابوي بعد اشد منها في العقاب.
والله جانت ايام وذكريات حلوه وياريت ترجع هيج ايام النا

هههههههههههههههههههههههههههههههههههههههه قرة العين والله ضحكتيني
قصتك لازم يصير فلم او مسلسل لانها جتير حزينة ههههههههههههههه بس حقيقة حلوة جتير
ههههههه

مرة انا كنت في الصف السادس ابتدائي كان صبح انا جيت ع الباب البيت شفت تكرمون حمار واقف يم البيت والمدرسة شوية بعيد من بيتنا قلت ايه هذا خوش فرصة لحتى توصلني ع المدرسة ههههه والله اكلت ريوكة و السيارة مالتي جانت واقفة يم البيت ههههه فمشى سيارتي وصلتني ع المدرسة شوية قربت من المدرسة الطلاب كلهم جاين علية ويضربون الحمار خطية وانا هم جنت بسيارتي هههههه وصدفتا اجى الاستاذ شافتني و انا ما دريان راحت الايام اجى اجتماع الاباء راحت ابوي ع المدرسة و اجى ع البيت قالت تعال ممكن تكلي عندك اجازة لحتى تسوق الحمار لو لا ههههههههههههههه قلت اي حمار؟ قال تعال يا اخ الحمار والله هاليوم ما تخلص مني ههههههههههههههه و هربت ما جيت ع البيت ههههههههه بس حقيقة ياريت مرة اخرى يجي سيارتي لان مشتاق لها هههههههههههه عاشو اخي الغالي على هالموضوع الرائع

[قرة العين]

هههههههههههههههههههههههههههههههههههههههه قرة العين والله ضحكتيني
قصتك لازم يصير فلم او مسلسل لانها جتير حزينة ههههههههههههههه بس حقيقة حلوة جتير
ههههههه

فعلاً اخي الكريم حياتنا اشبه بمسلسل من الذكريات والملئيه بالمفاجآت
عبر احداث صدرت من القضاء والقدر
ويوم جديد كتب على كل انسان في الارض.
والذكريات والمشاهد الرائعه المخزونه في ذاكرتنا هي نعمه لانها
تبعث للقلب روح الامل وروح الدعابه والفرح والاستمتاع بالماضي
فهي ايضاً تقوي روح الموده والمحبه والاخاه بين الاهل والناس والمعارف
عندما نتذكرهم عبر الذكريات الماضيه بحنين واشتياق.


سلم لي هذا المرور الجميل والطيب
ولاحرمنا الله من تواصلك معنا
دمت بخير وعافيه

اشكرج شكرا جزيلا يا اختي الغالية
قرة العين
تحياتي

[قرة العين]

مرة انا كنت في الصف السادس ابتدائي كان صبح انا جيت ع الباب البيت شفت تكرمون حمار واقف يم البيت والمدرسة شوية بعيد من بيتنا قلت ايه هذا خوش فرصة لحتى توصلني ع المدرسة ههههه والله اكلت ريوكة و السيارة مالتي جانت واقفة يم البيت ههههه فمشى سيارتي وصلتني ع المدرسة شوية قربت من المدرسة الطلاب كلهم جاين علية ويضربون الحمار خطية وانا هم جنت بسيارتي هههههه وصدفتا اجى الاستاذ شافتني و انا ما دريان راحت الايام اجى اجتماع الاباء راحت ابوي ع المدرسة و اجى ع البيت قالت تعال ممكن تكلي عندك اجازة لحتى تسوق الحمار لو لا ههههههههههههههه قلت اي حمار؟ قال تعال يا اخ الحمار والله هاليوم ما تخلص مني ههههههههههههههه و هربت ما جيت ع البيت ههههههههه بس حقيقة ياريت مرة اخرى يجي سيارتي لان مشتاق لها هههههههههههه عاشو اخي الغالي على هالموضوع الرائع

اشكرج شكرا جزيلا يا اختي الغالية
قرة العين
تحياتي

ذكرى رائعه وطريفه
تسلم اخي الكريم ع التفاعل الجميل والطيب
وع حضورك الرائع
مشكور والله يعطيك العافيه
دمت بخير وعافيه

[قرة العين]

الذكرى الثانيه
الموقع العراق بغداد الجديده
ايضاً مدرسة البحتري وفي نهاية سنة الثمانينات

كنتُ هنا في الصف الثالث ابتدائي
كانت لدينا معلمه لااتذكر اسمها بالضبط
وكان مادة تدريسها هي اللغه العربيه
واغلب الاوقات تتكلم معنا باللغه العربيه الفصحى وليس بالعاميه
وكان عدنا درس الدين ومعلمة الدين كانت مريضه
فجائت مدرسة العربي بدلاً عنها لكي تعطينا درس الدين
ولمن دخلت المعلمه على صفنا قالت للطلاب المسيحيين
هيا اخرجوا الى الساحه, لكونن انهم على دين المسيح
ودرسها يخص فقط دين الاسلام
وبعدها خرجوا الطلاب المسيحيين من الدرس
واني كنت جالسه في الرحله الاولى في الوسط
وبعدين المعلمه وجهت لي الكلام بالذات وقالت لي
الم اقل لكم على الطلاب المسيحيين ان يخرجوا من الدرس
فقلت لها ولكن انا لستُ مسيحيه يا ست لكي توجهين لي هذا الكلام
فالطلاب المسيحيين خرجوا من الصف
فقالت المعلمه رجاءاً اخرجي من الدرس
لان الوقت اخذ قسطاً من الدرس فليس هذا الوقت الان للمزاح.
بعدين اني صممت على كلامي ومطلعت من الدرس,
فالمعلمه متحملت وكامت تحجي وياي بالعاميه ,
وقالت بنتي درس الدين ممنوع ان يسمعوا طلاب المسيحيين
وهذا قانون اداري من المدير العام مو مني فليش كاعده تعانديني بنتي
فقلت لها : والله والله اني مسلمه مو مسيحيه
فسئلت الطلاب فلانه مسيحيه لو مسلمه ؟
فكلهم قالوا ست منعرف بس يمكن هي مسيحيه
انوب صارت عليه مصيبتين
فقالت لي :طلعي اي كتاب واقريه وفي الدرس القادم
عليج باحضار ولي امرك حتى اتأكد من هوية دينج
وفي المره الثانيه اصطحبت امي معي عندما جاء الدرس الدين
فالمعلمه شافت امي وانصدمت قالت انتي ام فلانه
امي قالت اي اني امها فحسيت من المعلمه ان هي ممصدكه امي
معتقده على انه انو اني جايبه وحده من جيرانا وامي هم حست بهيج
ولان اني مااشبه امي لان ملامح امي عربيه وملامح شكلي اوربي
علمود هاي يعتقدون على انو اني مسيحيه
وطبعاً شبهي طالع كلش على ام ابويه يعني حبايه ومفشوخه بالنص
( الله يرحمهم جميعاً)
فقالت امي اذا تريدين اصيح المعاونه ست قسمة حتى تتاكدين اني ام فلانه
فالمعلمه اعتذرت من امي وقالت لالا اني اصدكج وميحتاج حضور المعاونه
وطبعاً بعض اهل منطقتي ميعرفون انو اني مسلمه فكانوا ايعايدوني دائماً
بيوم عيد ميلاد المسيح ويقدمون لي الهدايا مثل الحلوى او لعب اطفال بسيطه تعبيراً عن فرحتهم للمسيحيين
وحتى هذا الشي كان يحدث لبقية اخواتي
لان اغلبنا طالع شكلنا على اهل ابويه الله يرحمه
وحتى في اوربا هنا اني مخلصانه من الناس لمن يشوفوني محجبه
يشكرون الله ويقولون الحمد لله اللهم زد وبارك على امة الاسلام
ويسولوني باللغه السويديه شلون دخلتي على الاسلام وشلون شفتيه
ومنو ارشدج وشجعج عليه معتقدين اني من اصول اوربيه
فلمن اجاوبهم باللهجه العراقيه المساكين ينصدمون مني
لان هم ممتوقعين ابد على اني من اصول عربي او من دول الشرق.
والحمد لله والشكر على كل حال