هوسات


احنه لليضيع اديارنا عنوان
واحنه لماننام وجارنا جوعان
واحنه اهل المعالي وللعرب تيجان
احنا انجوم الدنيه
وبينا الدنيا تباهي الناس

------------
تعلمنا كرمنا من النبي المختار
نضحك ونتبسم من يجي الخطار
بمضايفنا تضل مشعوله دوم النار
نصيح حول عدنه
من بعيد انحيي الضيف

----------
كرم اهل العراق مجرب ومعروف
الفقير يبيع هدمه لو اجوه اضيوف
علمنا البشر تكتب حچيها احروف
سومر اول كاتب
تشهدله احوفيه
------------
احنه اهل المضايف نخدم الخطار
مضايفنا سوى من البصره للانبار
وويانا الشمال وموصل الاحرار
احنه اسياد الدنيه
ونخدم لو جانه الخطار

--------
لدياله وصلاح الدين كلنا اشهود
وللبصره واهل الانبار اهل الجود
ولهذا الوطن بالاصل كلنا نعود
بيت ومنسف واحد
كلنا نگوم نحيي الضيف

كلمات الهوسات للشاعر
ناصر اسماعيل الموزاني