العمر دولاب

العمر دولاب
وثلثين الحجي جذاب
ولتغرك شتعله شجرة اللبلاب
-العمر دولاب
يفتر والحزن وياه
وجرح البلكلب خنياب
وجف مرسوم
صوره محنطه اعله الباب
وامس من جيت
طلكت الحزن والاه
واحس انه صرت زرياب
واعزفلك لحن شوكي واغنيللك
والم كل السوالف ما تكفيلك
واحيرن انه شهديلك؟
ردت عن كلشي اشجيلك
عنك ردت اشجيلك
واذب دمعاتي بشليلك
واسولف وانت ماتسمع
واريض روحي ماتهجع
ابوس خدود عيني
وكافي بسج نوح
ويرد يطفح دمعنه ونار يجويني
وبعد شتريد خليني
وحتى هموم راويني
يطيف وعاشرت عيني
ويطولك هيجي يلويني
ويجلمه تيتمت بشفاي
ويصوتي البجه حتى الناي
ويجدمي الرافك جدامك
ومشه وياك شايل طيف
واسمع صوتك بهيده
واكول يعود
وامني الروح بالجيه
وجذب ميعود !
ودرب الجيه جن مسدود
وما ابجيك ..
يل برخيص بايع واني الشاريك
ما ابجيك
جنت اجفل من يمر طاريك
وجويت الكلب عطاب
ظل عطشان من يرويك ؟
والعمر دولاب
وثلثين الحجي جذاب
وليغرك حبيبي شجرة اللبلاب
من دمع الجرح ينساب
من عشنه بشريعة غاب
من صاير حجينه عتاب
وودعنه الغزل بالماي
وبماي العكر نصطاد
والعمر دولاب
ومجنون الزمان يدور
ويفتر فرت الناعور
ومن يعطش يرد للماي
وخاف اعليه يشح الماي
العمر دولاب

[فراتيه انا]

لله درك

فقد كانت حروفك كالاعصار
في وجه الازرق
ابداعكِ فرض كلماته على الصفحات السحرية
لاحرمنا الله هذه الكلمات
لكـ خالص احترامي

شكرا من القلب سيدتي بنت العراق
واسعدني مرورك فعلا وفيض كلماتك
دمتي بخير

كلمات جميله جدا
وقصيده اكثر من رائعه
دام هذا الابداع
تمنياتي لك بالخير والسلامه

اخي الكريم زهير الرائع هو مرورك من هنا
ووقوفك على حروفي المتواضعه لك مني ارق النحايا

[الغربه]

صح لسانك يامبدع وفعلا العمر دولاب
شكراا لهذه القصيده المميزه جداااا