حضارة الموت
انه ابن الشمس والليل بيه افكار
واكف موشمع بس راسي صاير نار
واكف منصلب بين الحياه والموت
وانه الموت بيه يبتدي بتذكار
ماحس بألم من كد جروح الليل
كمت انزع جلد حتى امحي بيه أثار
يقلقني السفر من يركب المجهول
ماخاف اغترب انه اصلا بلا دار
ماخاف انكتل انه اصلا بلاروح
مدمن لاوجودي ومقتنع منهار
بس هاجس وطن يذبحني اسولف بيه
واهو مثلي شكثر محتاج الاستقرار
خدمته وماخدمني وعافني وحنيت
على سوره بجيت وشامراني حجار
انته شلون موطن وانه عايش بيك
سميتك بلادي وخذت مني ايجار
وازاني اعله غرفه وشيلاني بليل
منع عني التجول وادخلت انذار
ضيع مني غالي أي اخوي الراح
ضاع بلايه جثه وماقنعني الصار
كل هذا واحبك وانتخيك عراق
ماتسمع واكولن هسه الي يندار
واندارت عليه الدنيه وانته رضيت
من ردتك نسيم اتحولت اعصار
توازيت انفعل واكتب قوافي عليك
تنخيت القصيده وعاندت الاشعار
وجاملت الخلك عود انه مامجروح
اكتب عالثلج وانه بصفحتي النار
بس عوزي فضحني ودرت بيه الناس
كلت موهذا اني وضحكت الاعذار
حضاراتك حلم ماشفنه بس الموت
قريتك بس حروب من اول المشوار
كلت ابن الشمس بس مو جهنم هيج
يمر صيف انتقام من البشر لو ثار
واكف كلشي بيك وكهرباءك موت
وأله الله الفقير العايش بنص غار
رد مع اقتباس
المشاركة الأصلية كتبت بواسطة مهند صاحب الربيعي
