قصيده العبهه عدل
اليريد العنب بس أيده لا متلوح
عيب أيگول حامض هذا مو حاوي
واليريد التمر يصعد بحر تموز
مو نايم ظهاري أيريد خستاوي
صير أنت النجر صيد بظلام الليل
چثير من الزلم بيه طبع واوي
واليدور عشگ يصبر على بلواه
مو مره ايتشگه ومره سكتاوي
طبع بينه نحب بس ما نطخ ألراس
بعلو نجم الثريا ألراس متغاوي
انه اصل الكرامة ألغيره والأخلاق
ما چيتك انه وبيدي ورد مأوي
من عندي أطلبت همسات گبل أيام
وتأليهه اگلبت چنك ولا هاوي
العبها عدل ما ينفعك جوكر
أوراقك انكشفت جوكرك عاوي
لا أدور علي بالك تهدلي أدموع
جرحك بالگلب من عملتك داوي
ومن تدرس قضيتك لا توجها النار
ادرسها أبتاني أبنار هداوي
ومن تگطع ورد إياك من الشوك
ورده وتجرحك بالشوك غفلاوي
ولا أتحاول ابد أتمد أديك بنار
لان أيدك ورق فلسين متساوي
وبالك لا تدگ بيرغ حرب وياي
انه وكت الفشگ صاروخ نمساوي
بس انه أنصحك حر صير رفعه راس
وخل گلبك سمح لا أتصير سوداوي
وتعلم الهجر..... بس لا تأذي الغير
وخذ أحسن درس من ابن مهداوي
الشاعر
سلام الدراجي
رد مع اقتباس
المشاركة الأصلية كتبت بواسطة امير الربيعي
