الدليل القاطع عند ابو كاطع جزء 18

[ابو كاطع]

بسم الله الرحمن الرحيم
دائما نقراء او نسمع
المقولة التالية
ولكن هل هي حديث نبوي ام قول ماثور

علموا اولادكم الخط والنط والسبح في الشط

او
علموا الاودكم السباحة والرماية وركوب الخيل

وفي كل الاصوليات والاساسيات لهذه الاسطر التي وردت اعلاه نجد ان الاسلام يحثنا على تربية وتهيئة جيل جديد متسلح بسلاح العلم والفروسية والشجاعة والادب بكل تفاصيل هذه المواصفات
لكن ياترى الاشخاص الذين يسرقون مال الشعب بكل وقاحه وصلافة
الم يسمعوا او يقراءو هذه العبارات
ولاتنكسر اعيونهم من ايطلعون على شاشات التلفزيون
اويلي شكد يحجون واشلون حجي مسفط وملمع وبراق ورنان
وكانهم اولياء واصحاب كرامات
وخطيه البارحة مانايم لان شاف برنامج على احد القنوات اسمه
ما لايقال
وشاف دموع النسوان اشلون تكت مثل المطر
واحد ابوه يشتغل بالدولة
هسه اشيشتغل مالنا علاقه
جان بسوريا ايام المعارضه شاب لايتجاوز عمره ال16 سنة ودائما تجده في المناسبات الدينية التي فيها تمن وقيمة
اول الطابور
وبنص الطابور
واخر الطابور
شلون رهمت هاي
انت رهمها
وكان يستغل اسم ابوه في انجاز بعض معاملات العراقين المكاريد الي ما عدهم اقامة
ويخمط الي قاسمة اله
واذا رهمت الشغلة واجت
على لغة اهل الطاولي
راس كله
اتشوفه نافخ صدره
واذا ما رهمت
يجي بدالغه مال شلايتيه
ويخوف العراقي ابو المعاملة
عمي
ظم نفسك جم يوم هاي ما صارت
اتركه للشغلة احسن الك


ودارت الأيام
ومرت الأيام
ما بين شفط ولفط وخصام

وقابلته
نسيت إني من المظلومين واني خاصمته
ونسيت الدولارات الي نهبهاو إلي شفطه
وسامحت عذاب الغربة وبهذلتها وبهذلته
معرفش إزاي أنا كلمته
مع اعتذاري للسيدة ام كلثوم لتحريفي في مفردات الاغنية

سامحته لانه الان ابن مسؤل واسمه لايوجد ظمن اسماء المطلوبين للعدالة من قبل هيئة النزاهة
\\\\\\\\\\\\\\\\\\\\\\
اليوم اطلعت على خبر ان هئية النزاهة اعدت مشروع جديد لقانون النزاهة
جيد جدا ممتاز
لكن المضحك المبكي ياجماعه ياناس ياهو
العبارة التالية

وان القانون يناقش ألان في
مجلس شورى الدولة بانتظار
رفعه إلى مجلس الوزراء لإقراره
ومن ثم مجلس النواب لتشريعه..
\\\\\\\\\\\\\\\\\\\\\\\\\\\\\\\
ياحبيبي
كل مكان يطب بيه القانون ينام 3 اشهر على الاقل
لان
عيد الحب عطله
وعيد الام عطله
واعياد الحلاقين
والحدادين
والقصابين والمزارعين
واجتنا العطله الصيفية
وراها العطله الربيعية والشتوية والخريفية
شضل بالقاصة الخزينة
كلها انهبت وراحت
بعدين يوافقون
وتوكع براس المكاريد
الي خامطلة مائة دولار
وابو المليار
فلت
شمع الخيط وراح
والدليل القاطع عند ابو كاطع
والعهدة على الرابط
http://www.radiodijla.com/cgi-bin/news/news_item.pl?id=2009-03-07%2016:29:10

ياخويه ياابو كاطع مصيبه وكعت على روسنه وين انروح والمن نشتكي لغير الواحد الاحد

لغف وخمط ما يسولف وازيدك سالفه مرأة استشهد زوجها من الابرياء الذين قعطعوا رؤسوهم

في احدى المحافظات وترك زوجها البريئ الشهيد 3 بنات يتامى ولا معين لديها غير الله

احد المعممين الكاذبين الصلفين الوقحين قال لها اتابع لكِ هذه المسئله وسوف اجعل لكِ راتب يعينكِ انتي واطفالك ومن وزاره لوزاره ومن هاي السوالف اخر شي صار شريف هذا ابو عميمه كاله تتزوجيني (.................) مال كم يوم لك هاي المرأه بيا حال يانذل باابن النذل

ومن هذا النووووووووووووووووووووووووووووووووووووووووووووع هوايه ياخويه ياابو كاطع

حراميه بالجمله لا واحد ولا اثنين

ومن يطلعون بالتلفزيون تكول شكد عدهم حنيه على الشعب

أل الله واكبر وصلاة الفجر 4 ساعات عايز يعيط من الايمان والتقوى على كولت عادل امام


ويا قانون فساد هذا الي يحجي عنه هذا الافندي

اني لو من عندي اسميهم هيئه المفسدين بالارض



خليه سكته ياابو كاطع والله يااخي الحجي يتعب وهذوله ما يفيد بيهم

من الله يصخم اوجوهم بالدنيا والاخره هو هم الله مصخم وجوهم



تحياتي الك ومشكور على المواضيع الرائعه

تقبل مروري

[ام فيصل]

لاتـعـليـــــــــــــق

الا بعــد ولادة القرار وتفعيلــــــه
والله الموفق

مشكور يبو كاطع

[عراقي هواي وميزة فينا الهوى]

مع تحياتي
جيب ليل واخذ عتابه
الف شكر على موضوعك
تقبل مروري

[الياسري]

والله صحيح ابو كاطع
العطل دمرت البلد وخاصة التعليم جانو الطلاب يفرحون من تجي العطل وهسه يريدون الدراسة لان من وره العطل كامو يشتاقون للمدرسة علمود يشوفون اصدقاءهم
والخمط والفساد الاداري اخي ابو كاطع مو وليد اليوم صارله دهر وانته تعرف اخي العزيز سوه هدام لعنة الله عليه هو اصحابه وين وصل البوك بدولتنه
وهم الله يساعد الحكومه على الحرامية الي بيها شلون راح تصفيه ومنين تجيب اذا الكل حرامية وياهو الي تكول عليه هذا زين يطلع اكبر حرامي
بس هم نكول تفرج ياعراق مراح تظل هيج والله كريم

[sky]

الله اكبر و ليسكت الشعب عن حقوقه المنهوبة, لعد ثبوت الادلة و اكتفاء الحرامي عن النهب.

تحياتي لك اخي ابو كاطع و ياهيجي التطوير يابلاش, في عصر السرعة و الكمبيوتر سنين لاصدار قوانين !

تقبل تحياتي

[الحــر]

حياك الله اخونا العزيز ابو كاطع ,,,
ما وراهم شيء المهم القانون جاي يناقش
غير يعطون فرصة للي نهبوا وجرموا يرتبون حالهم ياخوية .!
كانهم طبقوا هذا المثل اجتمعوا على باطلهم مع الاسف من حيث لا يعلمون
شكرا لك مع خالص التقدير

[اهل العراق]

شكرا اخي العزيز ابو كاطع على الموضوع

الرائع يا رائع تقبل مروري اهل العراق