لا تتمنة ..
يا كَلبي لا تتمنة ...
ما طول جافانة الهوة وبطّلنة..
لا عين ظلّت خالية ولاظل ولِف يتعنّة ..
لا تِدِك يالدكَك قهر مقفول باب الجَنة ..
****
وهينوب مامش مِنّة
آ يا وكتنة الماصفت نيتة وزرك عَيننة..
طحنة إبوسط سلوة هِفة وكل ذيب يبرد سِنّه ...
ردنة نكَف وإنهوش نحمي الروح ما أمجنّة
وإنتة إبجلادت عين صحت إكلّنّة ..
وما طول راضي إبموتنة إستاطنّة ..
****
آ يا خسارت نوحنة ويا رخُص ذيج الونة..
ردفَن علينة إسهامكم وإعلة الصبر دامنّة ..
لا إحنة للدنية صفينة ولا هَوة الدنية إلنة ..
متبدّل إبطبعة الوكت لو إحنة التبدّلنة ...
****
آ يا هَواهُم بأول أيامة إشكثر دَللنة
ومن وصل طينتهة الظهَر كلهة إتبرّت منة ..
لا سالفة إبشفّة مُحب ولا عاذل اليعذلنة
أوحِشَت دنيانة وصفت جَنهة أبد موش إلنة..
متبدّل إبطبعة الوكت لو إحنة التبدّلنة ..
********************************
أرجو ان تنال رضاكم