قصيدة((شبابيـــــــچ إنتظــــــــــار)) ميثاق الهلالي
ليش كلما أوصل عيونك
تسد بوجهي باب...
وتطفه روحي.....
وترجع جنازه
بكبر فشلة جرح....
وليش كلما أنسه روحي بّاب شفتك
من تجيني تبوس جرحي
تگطّر شفافك ملح...
وليش تكبر بيّه ليل
عيوني ذبلت
خضّر بجفني ولو گطرة صبح..
آنه مذبوح أعله قبلة نار هجرك
لاتواسيني برمح..
ويالسچاچينك فلح
لاتگصي بيه....
جروحي صبخه
وماتفك ياخه الفلح......
و بكلشي أقبل
مرني لو تابوت بارد
مرني لو صفگة شماته.....
لياوكت
غافي عله بابك...
خل يمر طيفك
ولو شهگة نعش....
چنت أتاني الغيم يمطر صورتك
فوگ العطش....
ومرت الغيمه
وعصر وجهه النهر....
وانه وشفافي ودمعتي
تسودنت من فشلتني
وگتلي رايح.......
درت وجهي
وغيمتك مطرت سفر...
ماگلتلي من البدايه!!
الحب ضلاله ..
الشوگ لعنه...
حته لاأكفر وأحبك ...
وماگلتلي!!
عيونك الحلوات
مابيهن قرار!!!
وماگلتلي!!
الليل شيّع كل محطات الضوه
وصارت مگابر
حته ماتاني القطار....
وليش ترسمني شبابيچ إنتظار
وتخنگ خيوط الشمس....
ويذوب وي روحي الوعد...
وليش تصلبني عله بابك
وأنت تدري الشمس ماتت....
ماگلتلي الصبح مايطلع بعد..
ماگلتلي
الصبح
مايطلع
. .......
اتمنى ان تنال اعجابكم
تحياتي للجميع
رد مع اقتباس
رد: قصيدة((شبابيـــــــچ إنتظــــــــــار)) ميثاق الهلالي
