اريد مساعده بنات بليز دخلووو

[سومه]

مرحبا شلونكم
انشاءالله تمام
عندي سؤال ياريت تكلولي ليش هيج صار وياي
اني قبل يومين طبخة كبة الحامض والصراحه اول مره اطبخها
وسويت مثل مكلولي بالطريقة مالت الكبة خطوه خطوه يعني ولا سويت شي زياده لو ناقص
وطلع شكلها حلو ومبيها اي شي بس انو قاسيه يعني مو مثل باقي الكبب صلبه شوي ماادري ليش
يعني هيه هيج لو اني مسويه شي غلط
واذا عدكم طريقة انتو مسوينها ومضمونه ياريت تكلولي عليها لاان حريمه كل مااجيب المواد واسويها تخرب هههههه
يالله عيني انتظر ردودكم

[Bint Belady]

اختي الغاليه سومه الوردة عاشت ايدج على كل شي تسوينه..
عزيزتي اذا تقصدين حامض شلغم..
البعض يسويه بكبة الرز وهاي المقادير:

2 كوب رز..
نصف كيلو لحمة..
2 بصلة كبيرة..
ملح وفلفل اسود..
دهن/ زيت..

للحساء :
نصف كيلو شلغم (لفت)..
نصف كيلو سلق..
نصف كوب حمص
نصف كوب رز مسحوق او ناعم..
نصف كوب حامض ليمون..
بصلة..
دهن دهن/ زيت..
2ملعقة معجون طماطة (حسب الرغبه) قسم يحبوه صفره..
4حبات نومي بصرة..

الطريقة :

عمل الكبة :
ينقى الرز ويغسل بالماء ويترك فيه لمدة ساعة .يصفى من الماء وينشف تماماً..
يطحن الرز جيداً.. ويمكن استعمال دقيق الرز جاهز..
تؤخذ قطعة صغيرة من اللحم خالية من الدهن.. وتدق جيداً ثم تضاف الى طحين الرز وتعجن باليد حتى تصبح عجينة متماسكة..
تعمل الحشوه من البصل واللحم..
تشكل اقراص من عجينة الرز وتحشى بلحشوه وتساوى باليد وتترك..

الحساء:
يفرم البصل ناعماويقلى في الدهن..
يفرم السلق ويقطع الشلغم بعد ان ينظف ويحركان مع البصل لمدة خمس دقائق..
يضاف اليه المعجون المخفف بالماء ويضاف اليه الحمص والملح ويترك حتى يغلى
ثم يضاف نومي البصرة..
يضاف الحامض والرز ويترك حتى ينضج الرز ويتكون حساء متوسط القوام..
تضاف الكبة واحدة بعد الاخرى الى الحساء بهدوء وهي تغلى وتترك على النار
مع ملاحظة عدم التصاق الكبة بالقعر وذلك بتحريكها قليلا..
تترك تغلى حتى تنضج الكبة ويجب الاحتراس عند التحريك منعا من تفتت الكبة..
~~~~~~~~~~~~~~~~~~~~~

واذا بكبة البرغل احتمال كثرتي من السميد مع العجن..
وهذا الشي الي يخليه قاسيه..


واني راح اكتبلج مقاديركبة البرغل الي تصلح للقلي وشوربه سلق وحامض شلغم ولكل الأنواع..

بختصار هذا الي اني مسويته.. مقادير وحده صنعين منه عدت انواع

المقادير عجينة الكبة البرغل:

½1 كوب برغل الاسمر (اطيب تطلع)..
1 كوب سميد..

الحشو هو نوع حشوة الكبة العادية..

ينقع البرغل مدة نصف ساعه او اكثر..
ثم نظيف عليه السميد وبعدها نرش عليه الملح..
ورشة فلفل اسود ورشة كمون ورشة دارسين..



وهاي اني مشيته عليهم طباخه بريمو.. هاي اني انطتج السر حفضي الأحفادج..

ان شاء الله اكون افادتج بشي..
تقبلي مني ارق التحيه والسلام
وبلتوفيق

[قمـ بغداد ــر]

السلام عليكم

شلونكم بنات عيوني سومه اعذريني اني صار زمان ما مسويه كبة البرغل بس
والله بالعراق كنت اسوي احسن كبة لوجود البرغل هنا مع الاسف ماكو جريش



لكن حبيت اسأل بنوته عن هذا السر الخطير شلون استعملت السميد مع البرغل
عيني قوليلي حتى اعرف واسويها يعني طعمها يطلع نفس طعم كبة العراق والله
اني من قريت ما صدكت نفسي لان اخيرآ راح اسوي كبة البرغل وعندي سؤال
ثاني هل يمكن عمل الكبة الكبيره الي تسلق وتقطع مثلثات بنفس طريقة
السميد والله ما اعرف شلون اجازيج بنوتة على هذا الانجاز لان صدك الواحد
بنفسه كبة البرغل وخصوصآ بالشتاء


واذا ماكو زحمة عليج تكتبيلي طريقة الحلاوه الدهينية اي ((حلاة النجف))
اذا انتي مسويتها وتعرفين الطريقة لان اني دخلت هوايه مواقع وشفت كم
طريقة بس اني اريد طريقة استاذه المطبخ الفراتي بنوتة الغاليه وكل
الشكر مقدمآ


اختكم أم مرام

[Bint Belady]

يا هلا بام مرام الغاليه.. منوره واكيد الكبه من ايدج تطلع جنن..
واكيد تكدرين تسوينه بلمقادير المذكوره..
والسميد يساعد ان تتماسك الكبه.. وتكدرين تسوين كل الأنواع الي قلبج يحبه..

اني مره سويت وحده 25*25 سانتي متر.. وطلعة حلوه
واهلي يكولون مو صغيره هاي شويه.. ماكو اكبر

ام مرام الغربه علمتنه كلشي اله بديل الى الوطن والأحباب..
~~~~~~~~~~~~~

تدللين حبيبتي ولعيونج الحلوه مقاديرحلاوة الدهينه المظبوطه..
والى كل عائلة منتدى الفرات..

المقادير:
3 كوب سكر..
3 كوب طحين..
1 كوب دهن..
ثلاث ارباع الكوب ماء إو حليب..
2 إو 3 دبس التمر (حسب لون الدهينه.. اذا تردينه غامقه إو فاتحه)..<?xml:namespace prefix = o ns = "urn:schemas-microsoft-com:office:office" /><o:p></o:p>

لبغراش للزينه..<o:p></o:p>

الطريقه:
1- يوضع السكر والدهن والدبس والحليب على نار هادئه.. ويحرك حتى يمتزج جيداً..<o:p></o:p>

2- وآخر شئ يضاف الطحين بلتدريج ويحرك حتى يصبح جاهز..<o:p></o:p>

3- يدهن القالب/ الصنيه بلدهن وترش بلبغراش ويصب فوقه العجينه..
وبعده يرش فوقه البغراش ايضاً..

4- توضع الصينيه في قاع الفرن وعلى حراره متوسطه (مثال ْ350 عندنه.. اني احطه على ْ150)
ونتركه حتى يحمر الوجه وتستوى.. نخرجه من الفرن ونتركه تبرد وتتماسك..
وبعده نقطعه والف عافيه..<o:p></o:p>
~~~~

وان شاء الله اني اول ما اسوي صنيه راح اصوره وانزله الكم..<o:p></o:p>

حبيبتي ام مرام نصيحتي خلي قطعه الج والباقي انطي الأبو مرام والمرام الوردة
لئن اذا بقى راح تاكلينه كل الصنيه وحدج.. <o:p></o:p>

ان شاء الله اكون افادتج.. واني ما اجي الى من بعدج
تقبلي قائق التحيه والسلام
ودمتي بكل الود

[قمـ بغداد ــر]

هلا بيج عيوني كاعده انتضرج من
الصبح قلت اكيد راح تكتبلي الطريقة هسه من يجي
ابو مرام ندخل للمطخ نسويها لان هو
شاطر كلش بالحلويات وخصوصآ الكيك احسن مني اخرب حتى
هو يلحك يأكل قبل ما يخلص اذا ما موجوده
اني اقوم بالواجب لوحدي ههههههههههههههههه على قولتج
بس عندي سؤال ولو اليوم تعبتج بالاسئلة بالنسبة
للدبس هنا ماكو دبس التمر بس عسل اسمر
يعني مصنوع من قصب السكر يصير استعمل بدل
الدبس عسل نحل لو لا ودرجة الحراره عيوني هذا
الطباخ مصري ما مكتوب عليه درجة حرارة يعني ما
اعرف راسه من رجله شلون اتصرف يعني وسط وخلص لو لا
والف شكر لك وللوالده مره اخرى وكلامج هذا بس من طيبتج
وتواضعج عمري تسلمين بنوته

مع جزيل الشكر

اختكم أم مرام

[قمـ بغداد ــر]

صحيح بنوته علمود الكبة مسويتها ربع متر

شلون دبرتيها واي ماعون اخذها بس والله فنانه
اكيد دخلتي موسوعة غينيس للارقام القياسية

بالكبة مالتج مره ثانية سويها واعزمينا عليها مو تنسين

[Bint Belady]

بلعكس رحمه من الله حبيبتي ام مرام.. وطبعاً يصير تستعملين هذا النوع من العسل وبلنسبه لدرجة الحراره يعني اقل من الوسط إو وسط همين يصير وخليه بأرضية الفرن حتى يكسب من جوه أطيب..
واني متأكده راح تكون اطيب من الى اني أسويه والف عافيه..
~~~~~~~~~~~~~~~~<?xml:namespace prefix = o ns = "urn:schemas-microsoft-com:office:office" /><o:p></o:p>

هههههههههه اما الكبه العجز ابو الأختراعات..
جان جاي ظيوف للوالده واني تعاجزت وسويته كبيره حتى اتخلص بسرعه..
بس طلعت حلوه..
سلامي الج

[سومه]

يسلمووووو عزيزتي بنوتة على المقادير

واني سويت نفس الطريقة اولله مالت كبة الحامض الي ويا الشلغم وطلعت تخبل والله بس المشكله كتلج قاسيه شوي

محد اكلها بس اني وابويه خطيه ميريد يكسر بخاطري والبقيه كلهم كامت تعيط قاسيه

بس اني راح اجرب المقادير الي ذكرتيها انتي احسن يجوز الطريقة الي قبل مو مضبوطه طريقتج مبينه احسن

وشكرا على طريقة الكبه الثانيه انشاءالله همين اجربها

ويسلموووو على كل الوصفات عيني

تسلمين شنو رائيج نسويلج برنامج مع بنوتة اطيب

مثل برنامج مع اسامه اطيب

تحياتي لكي