العراق وطني..للشاعر فلاح عسكر..بمناسبة تاميم النفط
شوباش اخذني الحلم وارجعت ليل الهم
يبه هاذانه وردة وفه تكطعني لو تشتم
شتريد اصيرن الك شتريد اغني الك
موتاة اموتن الك
ولو عز عليك الحلم ولو شح عليك الدم
دمانه اصيرن الك اطشر والتم
منذور فدوه العمر لعيون ابو هيثم
جنه كبل فقره طين العكد بهدومنه
فقره تراب الدرب بوجوهنه
ولد الزناكين بحدايقهم غفو
واحنه.. واحنه على حصران الكصب يامالاهل غطونه
اولاد عمال وفلح...وبالمدرسه ما قبلو يسجلونه
وجنه نكظي الليل بعكود الاهل..احنه ودشاديش اللعب
ونهوس بعالي الصوت ربعنه لاتخافون ترى الكاع مسكونه ولمن كبر بينه العمر صار الصدك كاع الوطن مسكونه
وشفنه الحراميه تبوك الضحك من اشفاه الاطفال
وشفنه الوطن محبس وبيد الاجنبي
والديره مسبيه سبي
والصاح اخ من الظلم خاين بحق المملكة ومو عربي
ومن بين دمعات اليتامى مرت على الدنيا علامه
ومطرت سمه الديره مناشير
تكول الوطن للعرب مو للحرامية
تكول الخبز للعرب مو للحراميه
وتشابكن... وتشابكن وحده ويحريه اشتراكية
ويكبر ضوه الثوره عشك ويكبر ضوه الثوره محب
وبليلة التاميم من شال ايده بيرغ عل الطوايف
غنه باسمه كل فقير الغافي بجروح الصرايف
ولبست الديره سوار غنيه وذهب
باسم الشعب... اممنه نفطك ياشعب
وحنيه يوميه... و يوميه حنيه
وغنوات قائدنه اشبكت شوك وظفاير طفله كرديه
وحنيه يوميه.. ويوميه حنيه
والمايحب الشعب شلنه بلياليه
يوميه حنيه... والمايحب البعث من نريد اغانيه
سوينه جبهة خير قوميه
وزرعنه فوك الدرب وردات جوريه
وتالي صار الشعب شدة ورد والريحه عربيه
للثوره........
سافرت للولايات البعيده واظن تدري ياحبيبي دموع المسافر قصيده
وزين تدري ياحبيبي اجروح المسافر محطات وسوالف
عمي ومايخالف
خلهم يزرعون على السجه خناجر....ميخالف
خلهم يبجون ضحكات الشفايف....ميخالف
خلهم يذبحون هوسات المضايف...يبه وميخالف
اليحب لو ينطي روحه لو يظل بلا حبيب وما يوالف
انه جيتك يالحبييب ناكل الوحشه وفرح روحي سوه
مشتهيك تعبر على اجروحي ملح... وغير ملحك ما رهم على اجروحي دوه
يالحبيب ليلك ابيض من صبحهم يالحبيب
يالحبيب ويالطبعك فراتي وما تلوك الغيرك اثياب الضوه
جنت غركان بدغشهم
وتدري بالغركان من اتشيغ روحه تصعد الريه لركبته ويحلم بشم الهوى
وانه من طفو شمعتي ما صحت كلبي انجوه
جيت اغنيلك ياحزبي.. وهذا طبع الشمع من يحترك يضحك جه نذر روحه ضوه
وانه ما بين الضوه وبين الهوى جيتك قصيده
واله حوبه واله شاره الجرحوا كليبه وطفوا شمعات عيده*
ويبه ما اريده
الي يصلي بدين مايعرف مرامه... ما اريده
الي ما عشك ديرته واهله وكاعه وملحمه.... ما اريده
المايحط اسمي على اجتافه قصيده...ما اريده
وبيده بيده
الي يريد الطيب يزرع طيب بيده
والي يريد يموت يحفر كبره بيده
خلهم يكولون ثورتهم بعيده
طبع كلبي من يشوف الورد يعطش يزكي طعم الشوك بموية وريده
ياحبيبي معتنيك
مو شمعه تضوي الدرب تضويله عشر شموع
يامن ضحكتم امس ضحك المذله دموع
ولكم ماعدنه ليل الجرح
جروح النضال شموع
واحنه بهوانه الفرح لا لا تضيعونه
واحنه بيدينه الشمس ياعمي شوفونه
بويه والمايوَجِّد الشمس جا شِلَّه بعيونه
والمايوجد الشمس جا شله بعيونه
للحلول الاستسلاميه........
بالاذاعة اسمعنه طاري الموت مر بيكم واجينه
ولا عتبنه ولا حجينه
والف ياعيني بوداع الاهل من ودعونه
اموادع الحب الحبيبه وبالملبَّس غركونه
صرنه غناوة محبه
شايب بدشداشه هوس
روح بويه مسافرين وداعة الله وياكم
صرنه سالوفة محبه
هاي تتباهة بابوهه وذيج تتباهه باخوهه
وذيج طفله تركض عل رصيف بيوم شافت فوك دبابه ابوهه
عيني ياجيش العراق
مسلح بفكر وعقيده
عيني ياجيش الكرامه
سعود وحميد وفاضل
اتحزمو بحزام موت وسوو الدمعه ابتسامه
ومصر هي الي تشهدلنه
ودمنه فوك الكاع صارلهم علامه
ولاسماهم لكل الاطفال بلا بطايق شافو اطفال الكرامه
عيني ياجيش العراق
ولك يابريد الريح اخذ مني رسايل للمعارك
وبالرسايل... والده توصي ابنه...
يمه زفيتك الكاعك , وانه اريدك لو تضل بيهه حبيييييييييييييييب لو ترد لي شهيد
يبني يبني. هاك هذا الجرغد اخذه
يمه وشده على النطاق يمه سوي الحزن عيد
يمه سوي الغيره مهره والي يسوي الغيره مهره يوصل الدرب البعيد
والله اكطعك بالهلاهل من ترد لي شهييييييييد
عيني ياجيش العراق
يمه عمري وياك سافر من جديد
يمه يمه....... يمه احلم بيك كل ليله واشوفك
وتدري بطبع الوالد من تحلم بابنه تصير دمعته بريييييييييييييييد
عيني ياجيش العراق
يمه وعيونك مكيفة حتى خيك بالعكد كاعد يغني
مرحبا يامعارك المصير مرحبا يامعارك المصير
يمه وما يصير الغرك الدمعات بمية الهلاهل ما يحير
الكتب بالرشاش جلمات( القضية ما يحير
السَوَّه درب العار مرجع للكرامة ما يحير
يمه وهذا طبع الشعب لو حب الحياة يصير عنده الموت عيد
ويصنع النصر الجبير
وهله بيهم
ازلام ديرتنه النشامى هله بيهم
انخلط دم السوري ويه دم الفدائي
انخلط دم المصري ويه دم العراقي
هله بيومك هله ياجيش العرب
هله يامحزم بغيره هله يرباب المضايف
هله يرباب الكصب
ما يكفي الحجي بسطور الجرايد(21)
من يثور الدم حطب
هله ياجيش العرب
طبعك بكل ظلمه ضي امشي ما طول العمر لساعة حي
امشي واسحك عل الجروح
والي يسحك عل الجروح يحس حتى الشمس فَيّ
فاير(22) انته خلي يمر العطش بيك
ومن يمر العطش بيك صيح للجندي لكبالك ياله خَيّ
نمشي بدروب الكرامه والي يدافع عن كرامه يشرب من النار مَيّ
عيني ياجيش العراق
ويوم واثنين وثلاث تيام وكلنه نغني للنصر ونركص للايام
ولا جن ويا اوف من جلمة اللاجن
باعونه بدرهم غفل... ويافشلت الفشله... شنكل للايدونه؟
نكسن بطل السلام؟
السادات امام السلام؟
كيسنجر نبي السلام؟
ولكم سهير زكي حمامة السلام؟
كَييِّف ياملك حسين وتفنن....وكييف ياملك فيصل والله وترهدن
بويه طك الحديد عل الحديد ورن
بويه طك الحديد على الحديد ورن
رد مع اقتباس
