الليل موحش !!!
وحاضن جناح الظلام
والرصيف الجنت اعرفه
دار وجهه وماعرفتي
وحتى بيبانه الجبيره بوجهي سدهه
يعني اظل الليله حاير
وين انام ؟
لو زعل مني الرصيف !
وانه والليل
وصحبة الصفنه جكاير
وصوت موحش
يذبح بسجينه عميه
انبل واصدق مشاعر
ورغم ذلك ردت اجيك
وردت الم الليل كله اباب عيني
واصرخ وصوتي يدوي
يفزز عيون الرصيف !
اني ذبلني العطش
والماي ارتجيك !
والليل موحش
والدرب مو ذاك دربي
وحتى دربي غيروه !
وزرعوا الموت بطريقي
وهم اجيتك
وبعت روحي بسوك خرده
واشتريتك !
وحتى لو كلبك طاوعك
انت وبعتني
وحتى لو ادير شوفك لو شفتني
وحتى لو كلبك شاورك عني
وعفتني
ابقه اوصفك وفارس انت
بكل قصيده
وانت عينك تبحر بروحي
سفينه
وانت طولك واه يطولك
غالب ايامه وسنينه
وعله شفافك كلشي يغفه
الشعر يغفه
واني اغفه
والموت يغفه
وعله خدودك خيم النور
وحنينه
وردت سهامي علّي
مكسرات اباب صدري
ومارمينه اذ رمينه
واني اجيت ومالكيتك
وانتظر هلبت تجينه
انتظر هلبت تجينه !!
والليل موحش
وانت ماكو
وحاضن جناح الظلام
*****
ماجد الشاعر
ـــ27ــ 5 ــــ2009 ــــ