تغيــــــــــــــــــــــــــــرتـــــــــــــــــ ـــي

[محمد عبود العبودي]

تغيرتي
زهت بعيونج الدنيه وتغيرتي
وحله بعينج رسم غيري .....اولاكلتي
وربيتي بين حسراتي... وتدللتي
وخفت اعليج من روحي ... اولا خفتي
وتكبرتي
نمى بجنحج نسل جذاب يفلانه وتكبرتي
ومشيتي بدرب اليشمتون مارفلج كلب ساعه وتلفتي
ولاهمج كلام الناس وبمشيج تعثرتي
وسهرت اشكد سهرت اعليج وانتي بلا كلب نمتي
ونسيتي ولا تذكرتي
نسيتي الجان مثل الطير لو مسج برد تحميج جنحانه
ونسيتي الجان مثل الليل ياما لملمج بذراعه واحضانه
ونسيتي الباع حفنه سنين من عمره ورجع بجدام خجلانه
وصبره ولا صبر مجنون قاسي ويا سجانه
تعب لجلج تعب فلاح خانت بيه كيعانه
لملم كل عذاب الكون بيده وشال شكبانه
ورد بجفوف تعبانه
حسافه اللي تعبنه وياه ينسانه
ربه بفينه وخشن عوده وتكوه وظيم جازانه
هظيمه اللي نشد جرحه يسد بابه اويه ملكانه
ومر مثل الغريب بلا خجل يمنه وتعدانه
وبعد شنكول يفلانه
اذا ظيع حجينه وياج ميزانه
يالطبعج طبع عصفور ينكر كل تعب لو شاف جنحانه
ويالحجيج حجي الدلال اكثر من كلامه يصير حلفانه
واكول النوب هذا انه
البنيت اعليج وسط الروح زنزانه
وطلعتي وخنجرج لليوم ظل مطبوع نيشانه
وهذيج انتي الذليله اللي نص تموز بردانه
ويرد يعقوب لاحزانه
ارد اسحك كلب تعبان تسري النار بكتاره
ارد بروح كلهه جروح كلهه هموم تتباره
ارد خجلان مثل العاش عمره يطمطم بعاره
ودليلي الجان يحلم بيج يغفه ويحلم بثاره
ينام ويصحى تالي الليل ناره توكد بناره
وشجاهه الروح محتاره ؟؟
الرخيص يظل رخيص شما غلت بالسوك اسعاره
ويظل طبع الرخيص هواي تجاره
والخاين يظل منبوذ من اهله ويظل مكروه من جاره
وباجر لاندم ينفع ولا دمعات تتجاره
وكلمن يكشف اسراره
ونكعد نكشف المستور واسلط عالظلام النور
واحط بيدج عذاب وجور
واشوفج جرحج المسموم واثاره
واشوفج حركة المغدور لو يتخاطف اعلى العين غداره
واسولفلج عذاب سنين جنه غيوم مطاره
عذاب يبجي حتى الجان قاسي وكلبه احجاره
وهلبت بالدمع شاره
هلبت ذكرى مرت بيج مره وبيه فكرتي
لجن تبقين ذيج انتي
التعبت شكد اعدل بيج عوجه وما تعدلتي
وتغيرتي
وزهت بعيونج الدنيا وتغيرتي
وحله بعينج رسم غيري اولا كلتي
ت . غ . ي . ر . ت . ي

بقلمي
محمد عبود العبودي

[مريم جبران عودة]

من الطبيعي ان تتغير وان تتبدل

فهذه طبيعة الايام

وموضة عصرنا


شكرا لكم لجميل الطرح

[أنثى شرقية]

ورد بجفوف تعبانه
حسافه اللي تعبنه وياه ينسانه
ربه بفينه وخشن عوده وتكوه وظيم جازانه
هظيمه اللي نشد جرحه يسد بابه اويه ملكانه
ومر مثل الغريب بلا خجل يمنه وتعدان

حلو عاشت ايدك
تحياتي

[الوردة الجورية]

رائع جداً ما سطرته اناملك الذهبية هنا من أبداع وروائع تقبل مروري وتحياتي لك بانتظار جديدك

[سلام الدراجي]

يالطبعج طبع عصفور ينكر كل تعب لو شاف جنحانه
ويالحجيج حجي الدلال اكثر من كلامه يصير حلفانه

اخي العبودي طبعا انت شاعر انا اعتقد بهذه القصيده اثبتت شاعريتك بالرغم من مواضيعك قليله تحيه من القلب لاحلى شاعر في منتدى الفرات واطلب منك ان تتفاعل اكثر مع الردود تحيه شاعريه لك وبارك الله بيك لهذه القصيده الرائعه ودمت بخير

[ام علاوي]

واشوفج حركة المغدور لو يتخاطف اعلى العين غداره
واسولفلج عذاب سنين جنه غيوم مطاره
عذاب يبجي حتى الجان قاسي وكلبه احجاره
وهلبت بالدمع شاره
هلبت ذكرى مرت بيج مره وبيه فكرتي....

مااقسى الخيانه ومااشد حزن المخدوع
ومااغزر دموعه
ولكنها هباءا منثورا امام قسوة قلب الحبيب
شكرا لهذا الطرح الرائع
وشكرا لروعة المعاني
تحياتي يامبدع
كنت هنا
ام علاوي

[ام فيصل]

واكول النوب هذا انه
البنيت اعليج وسط الروح زنزانه
وطلعتي وخنجرج لليوم ظل مطبوع نيشانه

لادواء للغدر
احسنت التعبير والوصف
قصيدة رائعة تصارعت فيها الذكرى مع الشوق واللوم

لاحرمنا هذا المداد عزيزي
ننتظر جديدك القادم
كن بالقرب
مع تحياتي لك

[محمد عبود العبودي]

من الطبيعي ان تتغير وان تتبدل


فهذه طبيعة الايام

وموضة عصرنا

شكرا لكم لجميل الطرح

MARI-AM
شكرا لك اخي الغالي
لهذا المرور الطيب
تحياتي لك وامنياتي