عاجل
كلمة تعودنا على مشاهدتها يوميا في شريط التايتل في كل الفضائيات العراقية والعربية
يخبرنا
عاجل افندي
ان انفجار في بغداد
او
انفجار في الموصل
او
انفجار في البصرة
او
انفجار في الحلة
او في كل محافظات العراق الحبيب
سئلت عن عاجل من يا عشيرة ومن يا عمام وين بيتهم وشيشتغل واشكد راتبه الي اربع وعشرين ساعة موجود صبح وليل ليل وصبح
فلم اوفق في معرفة
عاجل
ولكن احد الاصدقاء انقذني
وقال لي
عاجل
شخص ظهر للوجود في العراق بصورة علنية وواسعة وعلى كافة الاصعدة بعد سقوط بغداد او احتلال بغداد او تحرير بغداد او سقوط الصنم او نهاية الدكتاتورية بكيفكم اشلون تردون اتسمونه سموه
وقال لي
ان
عاجل
متواجد دوما تحت الطلب مثل
104 ايام زمان والرقم خاص بالنجدة
تطل علينا المذيعة او المذيعات في اغلب الفضائحيات عفوا الفضائيات وهي مصبوغة من راسها الى اخمص قدميها بالبوية والبنتلايت الاحمر والاخضر والازرق وكل الوان الطيف مثل الوحدة
الي ما شايفة وجوعية
عباله هي بالمكياج
مو علچ المخبل ترس حلگه
عاجل
تطنق عاجل وهي مبتسمة
ما اعرف
عاجل يدغدغه الله اعلم
انفجرت ثلاث سيارت في بغداد
تتصل بالسيد فلان الفلاني عضو مجلس محافظة بغداد
وبعد وهلة
ناسف لم يتحقق الاتصال
وبعد اشوية
تعود اهلا استاذ فلان الفلاني عضو مجلس محافظة بغداد اهلا بك على الهواء مباشرة مع قناة ال ـ ـ ـ ـ الفضائية
يرد وبصوت اجش ومتنك علينا وصورته طبعا مرتبة ومرتب وقاط ورابط والله يرحم ايام الدشاديش البازة المقلمة
اهلا وسهلا ونشكر قناة ال ـ ـ ـ ـ
لاتاحة الفرصة لي
تقول المذيعة المصبوغة
استاذ باعتبارك عضو مجلس محافظة بغداد
ما هو دوركم في التصدي لهذه الهجمات التي اجتاحت بغداد
يقول الاستاذ الموحترم عفوا المحترم
اح اح اح اح اح صوته مطبك لان امثكل البارحة ومكعبات الثلج
مأثرة على صوته
شوفي بغداد هي قلب العراق وعاصمة العراق
ماشاء الله اشدعوه على هاي النباهة والفطانة وهاي المعلومة بغداد عاصمة العراق
واشتغل التشخبط مالته والكلام المنسوخ القاعدة وفلول البعث الصدامي
زين وبعدين
والله حفظناها عن ظهر قلب يمعودين
انتوا شنو سويتوا شنو اقتراحاتكم شنو قدمتم للخطة الامنية الصبات الكونكريتية كثرتوها
ابدا ولا يعرف شيجاوب
المذيعة المصبوغة تقول شكرا أستاذ لااعطائنا من وقتكم
هو اشعنده واخذتي من وقته
تخامة ورگع بوب
بس رواتب قوية
بالمناسبة
تمكن احد اللصوص من سرقة مسكن احد اعضاء مجلس محافظة بغداد في منطقة القادسية مقابل جامع ام الطبول واستحوذ السارق على
16 مليون دولار وحلى ذهبية تزن خمسة كيلوا
ادري بكال مال ذهب
ومنين جابهن هذا العضو
الف عافية ببطن هذا الحرامي والله حيل بيهم
مال المي للمي ومال اللبن للبن
ادرت جهاز التلفزيون على محطة اخرى وتظهر علينا الفنانة الراقصة عفوا المذيعة تتمرگص وتلف وتدور بالكرسي وتلعب بشعر راسها
معي الان على الهواء عضو مجلس محافظة بابل ـ ـالحلة ـ ـ
استاذ ما هي الاخبار واخر الاحصائية التي توفرت لديكم عن التفجيرات الاخيرة في باب معمل نسيج الحلة
نفس الكليشة مال عضو مجلس محافظ بغداد
لكن هذا قال
ان الحلة الفيحاء
هي بزمانك لو بزمن البابلين هي فيحاء وانتو سويتها جرداء
الاحصائية تبشر بخير وان شاء الله ماكو شي ولكن اعتقد هناك انفجار في قنينة غاز كانت داخل السيارة لاحد العمال ومن حرارة الشمس القوية انفجرت القنينة وتسببت في اضرار السيارت الاخرى
عاجل ولگ عاجل وين رحت تعال شوف يمعود
الله ينتقم منك ومن ساعة السودة الي شفناك بيها
تعال شوفلي هاي الصور مال قنية غاز
العباس عليك عاجل اذا تكذب الله يذبك بالنار عاجل امعود شوفنا هاي الصور
بدون تحيز
url=http://up.foraten.net] [/url]