من روائع الابو ذيات الاصيلة والقديمة**
ادناه عدد من البوذيات المميزه والتي ضلت لسنوات طويله تتداولها الناس ومتذوقي هذا اللون من الشعر الشعبي
وهذا للشاعر المرحوم كاظم الجنابي الملقب ب(كاظم شمعه)عاش متنقلاً بين عفك والبدير واستقر في قريه الفاضليه (نسبه الى اسم الشيخ صلال الفاضل) حتى مات فيها
انه ارضه تدوس جلاي وتدج
وتهود نار كلبي بلمس يدج
ليمته يوكحه صرت يدج
امس وامي تلم اجعاب اليه
وهذه للشاعر الشعبي اللامع راهي سعيد ال ناطور الشبلاوي
ضاع المحبس بجفك ولا بات
وكلب غيرك عسى اليبكه ولابات
الغيره والادب لحمه ولابات
بنص تنزل عله البيهم حميه
وهي رد على أبوذيه لشاعر من ذي قار على الارجح الشيخ عادل العبادي وهي
كلبي عله اليمر شوكك منابات
بتوته اتكطعن ماضل منابات
ابرايي الادب والغيره منابات
زلم بيه وزلم منه خليه
وهذه ايضاً للشاعر راهي سعيد ال ناطور
اضحك كول ريجي عسل مامار
تامر ماعليك النذل مامار
ثايه ومايهمه الراح مامار
كبل جده البخت بصل الحنيه
وهي رد على أبوذيه لشاعر من ذي قار على الارجح الشيخ عادل العبادي وهي
رياكي من جثير الصبر مرات
انكروني الجانو يمرون مرات
اعد وانصح واعاتب بعض مرات
وبعض مرات اكولن هاي هيه
وهذه للشاعر راهي سعيد ال ناطور
تهل عيني وانه مدامن لهله
ورحات الوكت ربعي لهله
الدنيا ارحيل مادامت لهله
البكه براسك يعنوان الثنيه
وقد رد على هذه الابوذيه الشيخ امين فليح حسن الفرعون من المشخاب وهي
من مثلي دمه دموعه يهله
جي غالب عله روحي يهله
وعلي تحيولكم دارس يهله
من تبدي تبد الروح بيه
وهذه للشاعر مشكور العايدي من قضاء الحي
خضعنه للدهر بالغصب طعنه
وطعنه الوكت طعنه بثر طعنه
عصينه ارجال اسف لنذال طعنه
الاسف شيفيد صار الصار بيه
وله ايضاً
ضوه بالدار عكبك ماشعلنه
مشيت ولادرينه ماشعلنه
جنت للنار يشكر ماشعلنه
شجاك ونار هجرانك سريه
وله ايضاً
علي دهري نصبله اشراك موتاي
وصرت هدهد براسي عرف موتاي
انشدك باليجيني عكب موتاي
شلي بجيته وفضل ماله عليه
وهذه لشاعر من قضاء سوق الشيوخ
يضل دلو الكرم بالروح يدلاي
عجيد ودوم للطيبات يدلاي
تمنيت الوكت كل حين يدلاي
اليمسه الضيم ويجيبه عليه
وله ايضاً
طافح دوم عالطيبه جوادي
اجود ولابشر يشكر جوادي
لونه الرته من عندي جوادي
هوه وجفي اطيهن سويه
وله ايضاً
سرو ونوو ضعنهم وين يردون
ضمايه ومن دموع العين يردون
لون اهلك حبيبي نجم يردون
اجيبه وابد مايصعب عليه
وهذه لشاعر من الديوانيه على الارجح المرحوم احميد ال سرهيد من عفك
بعدتو والدرب كطعه ولي شاك
وبعد كل الامل بيكم ولي شاك
الي لجمات بضلوعي ولي شاك
بدليلي بطول كطعتكم عليه
*****
شكثر عيني عليك دموع بديت
ولا واحد عليك بيوم بديت
انت لبالهجر وياي بديت
ورغم هاذا اكول الصوج بية
اتلفت زهرة شبابي بسوالف
وكضيت اسنيني هايم بسوالف
يدولابي دخيلك بسوالف
تلف مكلوب وين تريد بية
من خدك لكطع الورد وشتم
وما ادري أشبقه من الليل وشتم
مرخصك دوم سبني بزعل وشتم
بشخصي وخل تلوم الخلك بية
ليالي السود حتى أسمي محنة
بسب دهري علي يردف محنة
حبيبي شبيك ما عندك محنة
ولك بس بالنفاهة تصير الية
وهذه لشاعر الحلة الظريف الملا محمد علي القصاب
ذلولي الشوك بارض الشوك نخلة
ولاساعة من الحسرات نخلة
صرت مثل الالة بالشام نخلة
الثمر للغير واني النار الية
شبدة مني وشخصك علي ماطل
وحبل مواصلك وياي ماطل
ودليلي من الصبر بجفاك ماطل
مثل روح التماطل بالمنية
عكب النغم كلي وشبكالي
حبيبي راح مني وشبكالي
يصاحب صيد كلبي وشبكالي
ترى ترفرف جناحة لعم علية
الشمس كلي يصاحب شعلة منهة
وترى وجنة حبيبي شعلة منهة
ثاري العين تكره شعلة منهة
مثل ماتكره الروح المنية
خزرني وصد حبيبي وكلت والناس
متكرب يل الي بدنياي وناس
كلتلة ارد ابوسك كال وناس
اخو نكلهم يريد يبوس اخية
رد مع اقتباس
المشاركة الأصلية كتبت بواسطة اسعد الغريب
