ومره قلمي شبيك خصاني بسؤال ------- راد يعرف غايتي وشنهو السبب
كتله ياقلمي شعلامـــــــك وشبلاك ------- لو عرفت السبب يبطل هالعجب
وكتله سجل ياقلم هاك الجواب -------- وحتى لاتسالني وتكثر العتب
كتله هذا حسين نسل الطيبيــــن ------- هذا من اعظم اصل واشرف نسب
هذا دره الماتجي الهه مثيــــــل ------- هذا لؤلؤ صافي من ذاك الذهب
هذا ابن طه النبي خيـــر الانام -------- لاعجم مثله التجيب ولا عرب
هذا ابن حيدر علي سيد التقاة -------- هذا من حبه بكتاب الله انوجب
هذا ابن فاطم فخر كل النساء -------- هذا من ثدي العقيده الدر شرب
هذا سيد كل شباب اهل الجنان ------- هذا خامس اسم باللوح انكتب
وهذا لجل الدين قدمهه النحور ------- وهذا روحه لربه ولدينه وهب
وهذا آيه ويبقى رايه الماتطيح ------- هذا صرخة حق تفجر بالغضب
هذا تشهدله الطفوف بكربلاء -------- هذا ليث الغاضريه الماتعب
هذا هذا حسين يلتنشد عليـــه ------- شلون من طب المنايه ومن جهب
هذا صوته الهزهز عروش الطغاة ---- هذا دين وابد مادنيه طلب
وهذا صدره الصار ملجأ للسهام ----- وهذا جم حافر على صدره لعب
هذا راسه اللي اعتله فوك الرماح ---- وظل جسد مطروح والنوبه انسلب
وبعد كل هذا وتجي تسال عليه ------- حسين اول بالشرف نال الرتب
وانه لوله حسين صفر عله الشمال ----- وانه من حسين حصلت الادب
************************************************
ونسالكم الدعاء