الورد يكفر بالمدافع

[ابو علي الصكر]

وأقتربت الانتخابات وأنشق الوطن.. رسالة من يتيم عراقي إلى كل مسؤول عراقي ((الورد يكفر بالمدافع))

--------------------------------------------------------------------------------

الگصب لو يبس يكسر واهس الماي
الماي بلاگصب ليله شيجرعه
وأحنه بلافرح وندوّر بليل
وخيرنه الصبح يلگاله دمعه
گضينه الفرح بس بطرگ الشموع
وگضانه الفرح شمعه تطفي شمعه
أعله طور السوگ يغفن بينه الجروح
وتفز بالليل خلف الله عله فدعه
ويردبينه بوذية داخل يصيح
ولو لو صاح چن گلبك يشلعه

مثل نخله أرد أشبلك ون عراقي
يبست..وأنعه شطي ونعه راقي
تعال آنه أرد أون لك ون عراقي
وحگك حته فدعه تدوخ بيه

وعراق أستهلكن كل المواضيع
الموضوع الجديد شلون اطلعه
أشوف الدمع فوگ خدود الأيتام
ضحكه شلون! أچذب!هيه دمعه
أنه رايد سياسي يسولف وياي
وأريده يفيدني بگد ماأسمعه
وأريد اليندل جروح الوطن وين
وعلى كرسي الگلب بجفوفي أربعه
وأريد العينه تشرب دمع الأيتام
ماريد اليجي وعينه أعله ربعه
وأسولفله عله نص القطعه الأيجار
وواحد جارهم بايگله قلعه
وعله أم الشهيد أحچيله من راح
ببوذيه ودمع گضتهه تنعه
أياطعم الشهد بشفاي مروك
وراكوا فوگ گلبي روك مروك
خذوك گبال عيني وعلي مروك
وشطت لله لمن مروك بيه
وماريد التقاطع دوّخ الناس
آنه من الوطن رايدلي شارع
تقاطع صار عدنه بكل الأفكار
مايحتاج بالشارع تقاطع
وأريد بيوت للماعدهن بيوت
للگضّنهه حسره وعض أصابع
وأريد الماي يشغل حيّز النار
وأريد الورد يكفر بالمدافع
وببوذية العيد تسولف روح
جرح..دمعه..إبتسامه بكلشي قانع
وشقنع العيد هو العيد بطّال
وشكضه بياهدم بالگصر بطّال
أنه مگضي العمر عطال بطّال
ودمعتي وسگف بيتي يخر عليه
وغير وداع شتودي المحطات
وغير الموت شتجيب الزنازين
شقبضنه من السواتر غير الجروح
نرشهه دموع وتخضر سچاچين
وفتحنه عله الشمس بيبان العيون
ونزفنه آثار من كل الروازين
رادوا بس نضيع وداخوا شلون
بينه جروح ودموع ونياشين
نضيع شلون وأحنه أهل المحطات
ولهسه تسولف بدمنه الفراگين
نعم طحنه گبل بس تعرف شلون
بطيحتنه انگلب عد الموازين
نطيح چفوف يم شباچ عباس
ونگوم أرگاب يم شباچ الحسين00

مما راق لي من ميثاق الهلالي00
تحياتي
صكر

[محتاره]

الله ..بصراحه كلماتـ يعجز عن وصفها اللسان

شكرا لك على اختياركـ الراااائع

بأنتظار المزيد

ودىىى

[ام فيصل]

والله يالصكر مراح اكتب تعليق
واتصور دموع عيني الي نزلوا أكبر من كل تعليق
عاشت ايدك -- اختيار موقت عدل وجاي بوكته
واختيار موفق عيوني
والف شكر للشاعر الرائع والحساس والشايل هموم الوطن ( ميثـاق الهلالي )

وتحياتي لك -- ولكل شبر من ارض العراق من الفاو لزاخو

[الشاعر ماجد الدعمي]

لانك مبدع والعراق في حدقاتك لا تختار الا المميز والجميل
لك حبي ايها الصكر الكريم وللهلالي كل الود / تحياتي

[هاشم نجم]

حبيبي ابو علي الصكر
اختيار مميز وبوقته
وعاشت ايدك يامبدع
وان شاء الله الايام الجايه
انشوف الخير بوجوه الطيبين
الخيرين الراح ننتخبهم
تقبل تحياتي ومروري

[سلام الدراجي]

اني وين جنت على هاي القصيده الرائعه ما ادري يمكن جنت فاقد حبيبي ابو علاوي عاشت ايدك وايد الكاتبه والناقله والطابعه والله دوه اعله الجرح تحياتي الك يامبدع